ភ្នំពេញៈ បុរសជាជនជាតិចិនម្នាក់ បើករថយន្តកូរ៉ូឡាមួយគ្រឿង មកបុកពីក្រោយរថយន្តRANGE ROVER ស៊េរីទំនើបមួួយគ្រឿង បណ្តាលឲ្យរថយន្តបង្កនោះខ្ទេចផ្នែកខាងមុខ ស្ទើរតែទាំងស្រុង។ រីឯរថយន្តRANGE ROVER វិញរងការខូចខាតផ្នែកខាងក្រោយបន្តិចបន្តួច។

ហេតុការណ៍នេះបានកើតឡើងការពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី៩ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវព្រះមុនីវង្ស សង្កាត់វាលវង់ ខណ្ឌ៧មករា រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តRANGE ROVER ស៊េរីទំនើបឆ្នាំ២០១៧គ្រឿង ពណ៌ខ្មៅ មិនមានស្លាកលេខ បើកបរដោយបុរសម្នាក់ បានអែមមកខាងកៀនផ្លូវ ឈប់បានមួយសន្ទុះ ស្រាប់តែមានរថយន្តម៉ាកកូរ៉ូឡាមួយគ្រឿង ពណ៌ស្ករ ពាក់ស្លាកលេខ ភ្នំពេញ 2AF-4944 បើកបរដោយបុរសម្នាក់ជាជនជាតិចិន ក្នុងស្ថានភាពស្រវឹង ទិសដៅពីលិចទៅកើត តាមបណ្តោយមហាវិថីព្រះមុនីវង្ស លុះមកដល់ចំណុចកើតហេតុ ក៏បានរេចង្កូតទៅបុករថយន្តRANGE ROVER ពីក្រោយពេញទំហឹង បណ្តាលឲ្យបុរសជាជនជាតិចិននោះបោកក្បាលនឹងកញ្ចក់រងរបួសស្រាល។ ចំណែករថយន្តរងការខូចខាតផ្នែកខាងមុខរថយន្តយ៉ាងដំណំ រីឯរថយន្តRANGE ROVER វិញហើបកាងខាងក្រោយនិងកំពិតបន្តិចបន្តួចតែប៉ុណ្ណោះ ។