កណ្ដាល: ករណីចែកចាយគ្រឿងសម្អាងក្លែងក្លាយជាច្រើនតោន នៅព្រឹកថ្ងៃទី១៣ ខែវិច្ឆិកានេះ លោកហុក វ៉ាន់ធីណា ប្រធានសាលាដំបូងខេត្តកណ្ដាល និងជាចៅក្រមជំនុំជម្រះ ប្រកាសសាលក្រមផ្តន្ទាទោសបុរសជនជាតិចិនម្នាក់ ដាក់ពន្ធនាគារមួយឆ្នាំ ។
ប្រភពព័ត៌មានពីសមត្ថកិច្ច បានបញ្ជាក់ថា ជនជាប់ចោទឈ្មោះ ម៉ៅ លីជុន ភេទប្រុស (MAU LI JUN) ត្រូវបានឃុំខ្លួនដាក់ពន្ធនាគារក្នុងមណ្ឌលអប់រំកែប្រែខេត្តកណ្តាល តាមដីកាលេខ ៩៧៦ ចុះថ្ងៃទី០៥ ខែមេសា ឆ្នាំ២០១៧ ក្រោមការចោទប្រកាន់ពីបទក្លែងបន្លំម៉ាក និងនាំចូល ដោយចេតនា នូវទំនិញដែលមានម៉ាកក្លែងក្លាយ ប្រព្រឹត្តនៅពីរទីតាំងផ្សេងគ្នា ស្ថិតនៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ កាលពីថ្ងៃទី៣១ ខែមីនា ឆ្នាំ២០១៧ តាមមាត្រា៦៤និងមាត្រា៦៦ ស្តីពីម៉ាកពាណិជ្ជនាម និងការប្រកួតប្រជែងមិនស្មោះត្រង់។
តាមរបាយការណ៍របស់គណ:កម្មាធិការប្រយុទ្ធប្រឆាំងផលិតផលក្លែងក្លាយ បានបង្ហាញថា ជនល្មើសបានព្យាយាមប្រើប្រាស់មធ្យោបាយ សម្របសម្រួលក្រៅប្រព័ន្ធតុលាការ ដោយសន្យាផ្តល់លាភសក្ការជាច្រើនដល់ភ្នាក់ងារសមត្ថកិច្ច ដើម្បីបន្ធូរបន្ថយទោស ក៏ប៉ុន្តែគណ:កម្មាធិការ និងសមត្ថកិច្ចចម្រុះបានបដិសេធ និងចាត់វិធានការបន្តតាមនីតិវិធីច្បាប់យ៉ាងម៉ឺងម៉ាត់ ៕
មតិយោបល់