ក្រចេះ: លោកវរសេនីយ៍ទោ ចាន់ សុខគីម អធិការនគរបាលស្រុកស្នួល បានប្រាប់Post News ថា មានករណីផ្ទុះគ្រាប់ បណ្តាលឲ្យមនុស្សយ៉ាងហាចណាស់ ៣នាក់ ជាមនុស្សប្រុសរងរបួសធ្ងន់និងស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះ បានកើតឡើងកាលពីវេលាម៉ោង៩និង២០នាទី ព្រឹក ថ្ងៃទី២២ ខែវិច្ឆិកា ឆ្នាំ២០១៧ ស្ថិតនៅចំណុចភ្នំព្រិច ភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ។

លោកអធិការបានបញ្ជាក់ថា ជនរងគ្រោះទាំង៣នាក់ជាមនុស្សប្រុស មានអាយុ ១៩ឆ្នាំ ២៥ឆ្នាំ និង៤៥ឆ្នាំ ក្នុងនោះមាន២នាក់របួសស្រាល និងម្នាក់របួសធ្ងន់ កំពុងសម្រាកព្យាបាលនៅមន្ទីរពេទ្យ។ ក្នុងនោះលោកនៅមិនទាន់អាចបញ្ជាក់ពីប្រភេទគ្រាប់ដែលផ្ទុះនោះនៅឡើយទេ និងកំពុងធ្វើការវេចខ្ចប់បំណែកគ្រាប់ខាងលើប្រគល់ឲ្យខាងជំនាញដើម្បីត្រួតពិនិត្យបន្ថែម៕