បន្ទាយមានជ័យ: សកម្មភាពចាក់ដីលុបបឹងប្រឡាយពីសំណាក់ អ្នកមានអំណាច អ្នកមានខ្សែស្រឡាយ និងមានលុយ កំពុងកើតមានពេញបន្ទុកនៅទីរួមខេត្តបន្ទាយមានជ័យ ទោះបីជាមានការចុះហាមឃាត់ពីសំណាក់អាជ្ញាធរ ជាច្រើនដងក៏ដោយ ក៏ការបំពានល្មើសច្បាប់នេះនៅតែកើតមាន។
ជាក់ស្តែងកាលពីព្រឹកថ្ងៃទី០៩ មិថុនា ២០១៦ សមត្ថកិច្ចចម្រុះដឹកនាំដោយលោក លី សារី អភិបាលរងខេត្តបន្ទាយមានជ័យ បានចុះពិនិត្យ និងដាក់វិធានការហាមឃាត់ ដើម្បីចាក់លុបបឹង និងផ្លូវទឹកចេញវិញ លើដីរបស់អ្នកមានបុណ្យស័ក្តិ ផ្កាយ២មួយរូប ដែលកំពុងចាក់លុបបឹង និងផ្លូវទឹកចំណុចខាងជើងស្ពានទី១ ផ្លូវជាតិលេខ៦ ក្នុងសង្កាត់កំពុងស្វាយ ក្រុងសិរីសោភ័ណ ខេត្តបន្ទាយមានជ័យ។
លោក លី សារី អភិបាលរងខេត្តបន្ទាយមានជ័យ បន្ទាប់ពីដឹកនាំមន្ត្រីនៃមន្ទីរស្ថាប័ន ចម្រុះ រួមមានមន្ទីរធនធានទឹក មន្ទីរសាធារណ:ការ មន្ទីរសុរិយោដី និងអភិបាលក្រុងចៅសង្កាត់ លើទីតាំងខាងលើ ដែលកំពុងមានការចាក់ដី លុបបឹង និងចាក់ដីកាត់មុខប្រឡាយ ទឹកដែលត្រូវហូរឆ្លងកាត់ក្រោមស្ពាន សម្រាប់រំដោះទឹកជំនន់ពីក្រុងសិរីសោភ័ណ បានឲ្យដឹងថា តាមមន្ទីរជំនាញសាធារណការ បាននិយាយថា ផ្លូវជាតិលេខ៦ គិតពីអ័ក្សផ្លូវសងខាង គឺ២៥ម៉ែត្រ ចំណែកធនធានទឹកការចាក់ដីដូច្នេះ ធ្វើឲ្យរាំងស្ទះផ្លូវទឹកអាចបង្កឲ្យទៅជាទឹកជំនន់ ជន់លិចនៅផ្នែកខាងលើនៃស្ពានទី១ ជាពិសេសគឺ លំនៅដ្ឋានប្រជាពលរដ្ឋក្នុងសង្កាត់កំពុងស្វាយ ក្រុងសិរីសោភ័ណ តែម្តង។
ដោយឡែក បើតាមមន្ទីរសុរិយោដី ជាគោលការណ៍ទីតាំងខាងលើគិតពីក្បាលស្ពាន៩០ម៉ែត្រ ពុំមានប័ណ្ណកម្មសិទ្ធឡើយ តែពុំដឹកមូលហេតុអ្វីបានមានការចាក់ដីបែបនេះ។
បើតាមការឲ្យដឹងពីអាជ្ញាធរមូលដ្ឋាន ដីដែលត្រូវបានចាក់ដីលុបនេះ ជាតំបន់អានាធិបតេយ្យ ហើយសម័យសង្គ្រាមគឺជាបារ៉ែត តែបច្ចុប្បន្នត្រូវបានប្រជាពលរដ្ឋសង់លំនៅដ្ឋាន លើប្រឡាយទឹក ហើយដីខាងលើត្រូវបានចាក់លុបដោយឈ្មោះ ឡៅ សុខហួរ ជាសមត្ថកិច្ចពាក់ផ្កាយ២។
ទាក់ទង និងបញ្ហាខាងលើនេះ លោក លី សារី បានដាក់ចេញនូវវិធានការណ៍ ឲ្យអាជ្ញាធរ ក្រុងសង្កាត់ ស្រាវជ្រាវរកឯកសារពាក់ព័ន្ធដែលឈានដល់ការចាក់ដីនេះ ដើម្បីរាយការណ៍ចោល ហើយកោះហៅម្ចាស់ដីឲ្យកាយដីចេញដូចស្ថានភាពដើម ក្រោយមន្ទីរពាក់ព័ន្ធបោះបង្គោលកំណត់ដីចំណីផ្លូវ ដីបឹងប្រឡាយ។ បើសិនម្ចាស់ដីមិនអនុវត្តតាម យើងនឹងចាត់វិធានការណ៍ទៅតាមផ្លូវច្បាប់។
ក្រៅពីដីចំណុចខាងលើ ដែលចាក់លុបបឹងប្រឡាយនៅមានទីតាំងជាច្រើនទៀតដូចជា នៅខាងផ្លូវជាតិលេខ៥ ចំណុចស្ពានតាផាន់ ក៏បានការចាក់ដីលុបប្រឡាយទឹកដែលបំបែកពីប្រឡាយមេស្ពានតាមផាន់ដែរ ក៏ធ្លាប់ត្រូវបានអាជ្ញាធរចុះហាមឃាត់២ដង នៅតែបន្តចាក់ដោយអាងអំណាចអ្នកធំពីក្រោយខ្នង៕
មតិយោបល់