(ខេត្តកំពង់ធំ)៖ នៅថ្ងៃទី១០ ខែមេសា ឆ្នាំ២០១៦ នេះ ខណ្ឌរដ្ឋបាលព្រៃឈើខេត្តកំពង់ធំ បានដឹកនាំកម្លាំងផ្នែករដ្ឋបាលព្រៃឈើសណ្តាន់ សង្កាត់រដ្ឋបាលព្រៃឈើសណ្តាន់ សហការជាមួយអភិបាលស្រុកសណ្តាន់ រួមទាំងមន្ត្រីយោធា និងសហគមន៍ការពារព្រៃឈើ បានចុះប្រត្តិបត្តិការបង្ក្រាបបទល្មើសព្រៃឈើ ២ករណី និង ២ទីតាំងផ្សេងគ្នា។

ទីតាំងទី១ ស្ថិតនៅក្នុង ស្រុកសណ្តាន់ រឹបអូសបានទីតាំង រោងម៉ាស៊ីនអារច្រៀកឈើ ១កន្លែង ស្ថិតនៅតំបន់ ៥៥ ក្នុងឃុំរីង ស្រុកសណ្តាន់ ដោយរឹបអូសបាន ឈើអារជ្រុង ប្រភេទលេខ២ (ឈើទាល និង ផ្តៀក) ចំនួន ២០ដុំ ស្មើនឹង ៥ម៣៣៦០ និងម៉ាស៊ីនគោយន្ត (កម្លាំង ១៤សេះ) ចំនួន ១គ្រឿង។

ទីតាំងទី២ កម្លាំងផ្នែករដ្ឋបាលព្រៃឈើស្ទោង ចាប់ឃាត់បានរថយន្តចំនួន ២គ្រឿង ដឹកជញ្ជូនឈើ ដោយគ្មានលិខិតអនុញ្ញាតិពីរដ្ឋបាលព្រៃឈើ ក្នុងនោះ រថយន្តទី១ ពាក់ស្លាកលេខ កំពង់ធំ 3A-0557 ដឹកជញ្ជូនឈើអារលេខ២ (ផ្តៀក) ចំនួន ១៣៤សន្លឹក ស្មើនឹង ៤ម៣២៨០ និង រថយន្តទី២ ពាក់ស្លាកលេខ តាកែវ 3A-1977 ដឹកជញ្ជូនឈើអារលេខ២ (ឈើទាល) ចំនួន ៩៩សន្លឹក ស្មើនឹង ៣ម៣២១៦ ផងដែរ៕