ភ្នំពេញៈ ដើម្បីចូលរួមចំណែកក្នុងការធ្វើសប្បុរសធម៌ ជាមួយនឹងមូលនិធិកុមារសាវិនកម្ពុជា អតីតកវីនិពន្ធ ហង្សមាស លោក សុខ ជំនោរ និងតារាចម្រៀង វ៉ាន់ នីឡា បានបរិច្ចាគថវិកាចំនួន៥០ដុល្លារ រួមចំណែកទិញកង់ និងសម្ភារៈ ជូនដល់សិស្សានុសិស្សជនជាតិភាគតិចនៅមណ្ឌលគិរី។

លោក សាវីន ហ្វីលីព បានប្រាប់ឲ្យដឹងនៅមុននេះបន្តិច ថ្ងៃទី១៦ ខែមិថុនា ឆ្នាំ២០១៦ថា តារាចម្រៀង វ៉ាន់នីឡា បានបរិច្ចាគថវិកាចំនួន៥០ដុល្លារ ដើម្បីទិញកង់ និងសម្ភារៈសិក្សាជូនដល់កុមារសហគមន៍ក្នុងខេត្តមណ្ឌលគិរី ដែលជាកូនចៅជនជាតិភាគតិច។

លោក សាវីន ហ្វីលីព ថា «ខ្ញុំ និងមូលនិធិកុមារសាវិនកម្ពុជា សូមអរគុណដល់អ្នកទាំងពីរ ដែលបានចូលរួមចំណែកក្នុងអំពើសប្បុរសធម៌នេះ ដែលនឹងចាប់ផ្តើមនៅថ្ងៃទី២៣ ខែមិថុនា ឆ្នាំ២០១៦»។

ថ្លែងបន្តក្នុងន័យអរគុណ លោក សាវីន ហ្វីលីព បានបន្តថា ក្នុងនាមជាសិល្បករដូចគ្នា ខ្ញុំបាទសូមសរសើរដល់ទឹកចិត្តសប្បុរសរបស់ប្អូនស្រី និងលោក ជំនោរ ដែលបានចូលរួមចំណែកចែករំលែកសេចក្ដីស្រឡាញ់ដល់កុមារសហគមន៍ទាំងនោះ ហើយក៏អរគុណដល់ប្រិយមិត្តជាច្រើនទៀត ដែលបានជួយដល់សិស្សានុសិស្សជនជាតិភាគតិច៕