Post News Media ព័ត៌មានជាតិ ផ្អើលទៀតហើយ! ...

ផ្អើលទៀតហើយ! ថៅកែហាងKTV QI HAO GONG GOAN ម្នាក់ បង្ខំនារី២នាក់ ឲ្យទៅដេកជាមួយភ្ញៀវនាងមិនព្រមផ្ទុះហិង្សាវាយដំ!

ភ្នំពេញ: មានហេតុការណ៍ភ្ញាក់ផ្អើលមួយបានកើតឡើង បន្ទាប់ពីបុរសជនជាតិចិន​ម្នាក់ និងជាថៅកែហាងខារ៉ាអូខេយីហោ QI HAO GONG GOAN បានបង្ខំឲ្យនារី២នាក់ជាអ្នកបម្រើភ្ញៀវឲ្យទៅក្រៅ(ទៅដេក) ជាមួយមិត្តភក្តិខ្លួន តែនាងមិនព្រម ក៏បានធាក់ និងទះកំផ្លៀងនារី២នាក់នោះ បណ្ដាលឲ្យរងរបួស ទើបភ្ញាក់ផ្អើលដល់សមត្ថកិច្ច រួមទាំងប្រជាពលរដ្ឋ កាលពីវេលាម៉ោង៨យប់ ថ្ងៃទី២៣ ខែមេសា ឆ្នាំ២០១៨ នៅចំណុចមុខ KTV QI HAO GONG GOAN ជាប់ផ្សារបឹងត្របែកផ្លាហ្សា ស្ថិតក្នុងសង្កាត់បឹងត្របែក ខណ្ឌចម្ការមន រាជធានីភ្នំពេញ។

តាមការបំភ្លឺពីនារីរងគ្រោះបានឲ្យដឹងថា នាងមិនមែនជាបុគ្គលិកនៅហាងខារ៉ាអូខេខាងលើនោះទេ ដោយសារតែមានមិត្តភក្តិនាងជាបុគ្គលិកនៅទីនោះ នាងក៏មកលេង ហើយពេលខ្លះថៅកែហាងក៏ហៅមកទទួលភ្ញៀវម្តងម្កាល ពេលចប់ភ្ញៀវក៏ទៅវិញ។

ប្រភពបន្តថា លុះនៅមុនពេលកើតហេតុ មានមិត្តភក្តិម្នាក់ដែលជាបុគ្គលិក​ (នារីកំដរភ្ញៀវ) បានខលហៅនាងមកជួយកំដរភ្ញៀវ ដែលជាមិត្តភក្តិថៅកែ ពេលនោះនាងក៏បានមកមានគ្នាចំនួន៣នាក់​ ខណ:មកដល់ក្នុងបន្ទប់ ពួកនាងក៏ដើរចេញមកក្រៅវិញ ព្រោះភ្ញៀវទាំងនោះតែងតែបង្ខំនារីៗដែលជាដៃគូទៅដេកជាមួយ។ បន្ទាប់មកស្រាប់តែថៅកែមកសួរនាំហើយបានធាក់នាងពីក្រោយ បណ្តាលឲ្យដួលហើយចាប់ទះកំផ្លៀងចំនួន២ដៃទើបបង្កការភ្ញាក់ផ្អើលតែម្តង។

ក្រោយពីកើតហេតុភ្លាមៗថៅកែហាងខារ៉ាអូខេខាងលើបានសងថ្លៃជំងឺចិត្តចំនួន៥០០ដុល្លារ តែនារីរងគ្រោះមិនព្រម ទើបនាងទំនាក់ទំនងទៅសមត្ថកិច្ចមូលដ្ឋានចុះមកជួយអន្តរាគមន៍ ហៅជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលបឹងត្របែក ដើម្បីហៅជនបង្កទៅដោះស្រាយតាមច្បាប់។

គួបញ្ជាក់ថា ទីតាំងខាងលើតែងតែមានអំពើហិង្សាដាក់នារីៗខ្មែរជាអ្នកកំដរភ្ញៀវជាញឹកញាប់ តែមិនដែលមានអាជ្ញាធរមានសមត្ថកិច្ចមានវិធានការយ៉ាងណានោះទេ រីក៏ទីតាំងខាងលើមានខ្សែជាអ្នកធំទើបសមត្ថកិច្ចមិនហ៊ានបែបនេះ​ ហើយសូមបីតែស្លាកយីហោខាងមុខ ក៏គ្មានដាក់អក្សរខ្មែរដែរ ធ្វើដូចជានៅស្រុកក្រៅអញ្ចឹង៕