ភ្នំពេញៈ សម្តេចតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា នាព្រឹកថ្ងៃទី២២ ខែមិថុនា ឆ្នាំ២០១៦ នេះបានអញ្ជើញធ្វើជាអធិបតីភាព ក្នុងពិធីទទួលជ័យលាភីពានរង្វាន់ «កម្ពុជាជាគោលដៅទេសចរណ៍ល្អបំផុតលើពិភពលោក សម្រាប់ឆ្នាំ២០១៦» ដែលប្រគល់ដោយ ក្រុមប្រឹក្សាភិបាលទេសចរណ៍ និងពាណិជ្ជកម្មសហភាពអឺរ៉ុប នៅវិមានសន្តិភាព។

គួរបញ្ជាក់ផងដែរថា គណៈប្រតិភូក្រុមប្រឹក្សាភិបាលទេសចរណ៍ និងពាណិជ្ជកម្មអឺរ៉ុប ចំនួន ០៥រូប ដែលដឹកនាំដោយ បណ្ឌិតសាស្រ្តាចារ្យ Mr. Anton Caragea ប្រធានក្រុមប្រឹក្សាភិបាលទេសចរណ៍ និងពាណិជ្ជកម្មនៃសហភាពអឺរ៉ុប មកធ្វើទស្សនៈកិច្ចនៅកម្ពុជា ចាប់ពីថ្ងៃទី១៦ ដល់ថ្ងៃទី២៣ ខែមិថុនា ឆ្នាំ២០១៦ ដើម្បីផ្តល់ជ័យលាភីពានរង្វាន់ជូនដល់រាជរដ្ឋាភិបាលកម្ពុជា “កម្ពុជាជាគោលដៅទេសចរណ៍ល្អបំផុតលើ ពិភពលោក សម្រាប់ឆ្នាំ២០១៦ Cambodia – the World Best Tourist Destination for 2016 ព្រមទាំងប្រកាស កម្ពុជា ជាគោលដៅវប្បធម៌ពេញនិយមសម្រាប់ឆ្នាំ២០១៦ The Favorite Cultural Destination for 2016” ។

នេះ ជាមោទនៈភាពដែលជាតម្លៃធំធេងមួយទៀតសម្រាប់ព្រះរាជាណាចក្រកម្ពុជា និងប្រជាពលរដ្ឋកម្ពុជាទាំងមូល បន្ទាប់ពីយើងបានទទួលជ័យលាភីពានរង្វាន់ថ្មីៗនេះដែរ ពីទីភ្នាក់ងារប្រឹក្សាយោបល់លើការធ្វើដំណើរ ទេសចរណ៍ TripAdvisor ដែលទីក្រុងសៀមរាបបានឈ្នះជា គោលដៅទេសចរណ៍ល្អបំផុតក្នុងអាស៊ីសម្រាប់ឆ្នាំ២០១៦ Siem Reap as the Best Destination in Asia 2016 និងប្រាសាទអង្គរវត្ត បានឈ្នះជា ប្រាសាទល្អបំផុតក្នុងអាស៊ីសម្រាប់ឆ្នាំ២០១៦ Angkor Wat as the Best Landmarks in Asia 2016 ។
ដោយឡែកជ័យលាភីពានរង្វាន់ “កម្ពុជាជាគោលដៅទេសចរណ៍ល្អបំផុតលើពិភពលោកសម្រាប់ ឆ្នាំ២០១៦ Cambodia – the World Best Tourist Destination for 2016 ដែលប្រគល់ដោយ ក្រុមប្រឹក្សាភិបាលទេសចរណ៍ និងពាណិជ្ជកម្មអឺរ៉ុប នឹងរៀបចំធ្វើពិធីទទួលជាផ្លូវការនៅវិមានសន្តិភាពរបស់ រាជរដ្ឋាភិបាលកម្ពុជា នាព្រឹកថ្ងៃទី២២ ខែមិថុនា ឆ្នាំ២០១៦ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា។

សូមបញ្ជាក់ផងដែរថា ក្រុមប្រឹក្សាភិបាលទេសចរណ៍ និងពាណិជ្ជកម្មអឺរ៉ុប ត្រូវបានបង្កើតឡើងតាំងពីឆ្នាំ២០០៥ ដោយមានសមាជិកមកពីប្រទេសទាំង២៧ក្នុងសហគមន៍អឺរ៉ុប ។ ក្រុមប្រឹក្សានេះគឺជាស្ថាប័នចាស់ជាងគេ និងមានសារៈសំខាន់ក្នុងសហគមន៍អឺរ៉ុប ដែលមានជំនាញលើវិស័យស្រាវជ្រាវ និងផ្សព្វផ្សាយទេសចរណ៍ ដោយមានទីផ្សារអតិថិជនរហូតដល់៨០០ លាននាក់ក្នុងទូទាំងសហគមន៍អឺរ៉ុប។

គណៈប្រតិភូខាងលើនេះ បានធ្វើដំណើរមកដល់ព្រះរាជាណាចក្រកម្ពុជា ប្រកបដោយសុវត្ថិភាពតាំងពីថ្ងៃទី១៦ ខែមិថុនា ឆ្នាំ២០១៦ នៅខេត្តសៀមរាប និងបានធ្វើទស្សនកិច្ចចំនួន ០២ថ្ងៃ នៅខេត្តសៀមរាប កាលពីថ្ងៃទី ១៧ និង ថ្ងៃទី ១៨ ខែមិថុនា ឆ្នាំ២០១៦ ហើយបានបន្តដំណើរទស្សនកិច្ចមកកាន់រាជធានីភ្នំពេញចាប់ពីថ្ងៃទី ១៩ និងធ្វើមាតុភូមិនិវត្តន៍នៅថ្ងៃទី ២៣ ខែមិថុនា ឆ្នាំ២០១៦៕