បាត់ដំបង: បុរសម្នាក់ដែលគេដឹងថា ជាមន្ត្រីក្រុមប្រឹក្សាស្រុកកែវស៊ីមាខេត្តតមណ្ឌលគិរី បានបាញ់សម្លាប់ខ្លួនឯងនៅខេត្តបាត់ដំបង ដោយមានបន្សល់ទុកសំបុត្រមួយច្បាប់ នឹងរូបថត២សន្លឹក នឹងកាំភ្លើងខ្លី ផងដែរ បង្កឱ្យមានការភ្ញាក់ផ្អើលមួយ នៅព្រឹកថ្ងៃទី២៣ មិថុនា ២០១៦នេះ ស្ថិតលើភ្នំសំពៅឃុំភ្នំសំពៅ ស្រុកបាណន់ ចម្ងាយ១២គីឡូម៉ែត្រពីក្រុងបាត់ដំបង ខេត្តបាត់ដំបង ក្បែរច្រកចូលទៅអាស្រម «គិរីរម្យ» ដោយមានបន្សល់កាំភ្លើងអាការ១ដើម និងសំបុត្រមួយច្បាប់នៅក្បែរខ្លួន។
មន្ត្រីនគរបាលមូលដ្ឋានបានប្រាប់ Post News ឱ្យដឹងថា ជនរងគ្រោះដែលបាញ់ស្លាប់ខ្លួនឯងត្រូវគេបានស្គាល់ ឈ្មោះ ឆាន់ ចាំង អាយុ៤៣ឆ្នាំ មានមុខរបរជាសមាជិកក្រុមប្រឹក្សាស្រុកកែវសីមា មានទីលំនៅខេត្តតមណ្ឌលគិរី។ ជនរងគ្រោះជិះរថយន្តម៉ាកកាមរីស៊េរីចាស់ ពាក់ស្លាកលេខត០៩២៨ភព២។
មន្ត្រីនគរបាលបានបញ្ជាក់ថា បើតាមការអះអាងពីក្រុមគ្រួសារសពថា ជនរងគ្រោះបានជិះរថយន្តចេញពីផ្ទះតាំងពីថ្ងៃទី២១ មិថុនា មកម្ល៉េះ ដោយមិនដឹងថា គាត់ទៅណា និងមានរឿងអ្វីនោះទេ ហើយទូរស័ព្ទក៏ខលមិនចូលដែរ។ លុះដល់ព្រឹកថ្ងៃទី២៣មិថុនានេះ ក៏ស្រាប់តែមានគេប្រាប់ថា បានប្រទះឃើញសាកសពទើបបង្កការភ្ញាក់ផ្អើលតែម្តង។
សមត្ថកិច្ចសង្ស័យថា អាចបណ្តាលមកពីជនរងគ្រោះតូចចិត្ត និងជំងឺប្រចាំកាយ ទើបសម្រេចបញ្ចប់ជីវិតទៅ។ នេះបើយោងតាមសំបុត្រមួយច្បាប់ដែលទុកក្បែរខ្លួនសាកសព។ ក្នុងសបុត្រនោះបានសរសេរថា ប្អូនសុំទោស បងប្រុស បងស្រី ប្អូនស្រី ប្អូនសុំលាសិនហើយ ជាតិក្រោយកុំឱ្យឈឺច្រើនទៀត។ សពបងធ្វើបុណ្យនៅវត្ត កុំយកទៅផ្ទះ។
ដោយយោងតាមបណ្តាំក្នុងសំបុត្រ សាច់ញ្ញាតិបានសម្រេចធ្វើបុណ្យនៅវត្តក្បែរនោះ តាមប្រពៃណី៕
មតិយោបល់