ភ្នំពេញៈ ជាមួយនឹងការអំពាវនាវឲ្យមានការជួយសង្គ្រោះដល់ល្ខោនខោល ដែលត្រូវមហាជន និងយុវវ័យភាគច្រើនបំភ្លេច លោក សុខ ជំនោរ អ្នកនិពន្ធ និងជាអ្នកដឹកនាំរឿងល្បីឈ្មោះ បានអះអាងថា លោកនឹងធ្វើយុទ្ធនាការជួយដល់ល្ខោនខោលក្នុងទ្រង់ទ្រាយធំ។ ក្រៅពីគ្រោងផលិតស្ពត ផលិតបទចម្រៀងផ្សព្វផ្សាយ លោកក៏នឹងសហការជាមួយតារាសិល្បៈ ដើម្បីគៀរគរតារាសិល្បៈចូលរួមក្នុងយុទ្ធនាការលើកស្ទួយដល់ល្ខោនខោលឲ្យបានខ្លាំងក្លាផងដែរ។

លោក បានថ្លែងប្រាប់ Postnews ដោយផ្ទាល់ថា ក្នុងប៉ុន្មានថ្ងៃនេះ លោក និងក្រុមសាស្រ្តាចារ្យ ផ្នែកល្ខោនខោល និងអ្នកស្រឡាញ់ល្ខោនខោល បានពិភាក្សាគ្នាយ៉ាងខ្លាំង ដើម្បីចេញធ្វើយុទ្ធនាការផ្សព្វផ្សាយនូវប្រភេទសិល្បៈមួយនេះ ដើម្បីគៀរគរជំនួយទ្រទ្រង់ដល់សិល្បករល្ខោនខោលទាំងមូល។ លោកថា ស្ពត ដែលលោកផលិត នឹងត្រូវបានបង្ហោះលើនៅផេករបស់ល្ខោនខោល ហើយបទចម្រៀងដែលបង្ហាញពីការលើកស្ទួយល្ខោនខោល ក៏នឹងត្រូវបានផលិត ដើម្បីបង្ហោះជាសាធារណៈ និងផ្សព្វផ្សាយក្នុងពេលដ៏ខ្លី។ យុទ្ធនាការផលិតស្ពត និងបទចម្រៀងស្ដីពីការជ្រោមជ្រែងដល់ល្ខោនខោលនេះ លោកថា ធ្វើឡើងដោយការស្ម័គ្រចិត្តទាំងស្រុង ដោយមិនមានទទួលបានផលចំណេញ ឬផលប្រយោជន៍ពីការប្រឹងប្រែងនេះទេ។ លោកថា អ្វីដែលលោកជ្រោមជ្រែង គឺចង់បំផុសឲ្យមានការចាប់អារម្មណ៍លោកល្ខោនខោលឡើងវិញ និងដើម្បីឲ្យសិល្បៈមួយនេះ មានអ្នកបន្តវេន និងមានអ្នកជួយថវិកាឲ្យអ្នកជំនាន់ក្រោយអាចបន្តអាជីព។

អ្នកនិពន្ធរូបនេះបន្តថា នៅថ្ងៃទី៧ ខែកក្កដាខាងមុខ ក្រុមសិល្បៈល្ខោនខោល នឹងធ្វើពិធីក្រុងពាលីធំមួយនៅសាលាមធ្យមវិចិត្រសិល្បៈ នៅម្ដុំភ្នំពេញថ្មី បឹងប៉ាយ៉ាប និងនៅថ្ងៃទី១១ ក្នុងខែដដែល នឹងមានកម្មវិធីជួបជុំអ្នកស្រឡាញ់ល្ខោនខោលទាំងអស់ នៅក្នុងទីតាំងដដែល ដើម្បីផ្សព្វផ្សាយពីយុទ្ធនាការលើកស្ទួយសិល្បៈបុរាណនេះ ឲ្យបានទូលំទូលាយ។ លោកបន្ថែមទៀតថា ស្ពតដែលខ្លួនផលិត និងការគៀរគរតារាសិល្បៈ ឲ្យមានវត្តមាននៅក្នុងវេទិកាជួយដល់ល្ខោនខោលនោះ នឹងទទួលបានជោគជ័យ បើទោះជាមុននេះបន្តិចក្រុមមួយផ្សេងទៀត បានធ្វើយុទ្ធនាការស្វែងរកថវិកាតាមរយៈការលក់អាវ និងប្រគំតន្ត្រីនៅសាលាវិចិត្រសិល្បៈម្ដុំសារមន្ទីរជាតិ បានធ្វើយុទ្ធនាការបែបនេះម្ដងហើយ ប៉ុន្តែឃើញមានការចូលរួមពីសំណាក់អ្នកមានបំណងផ្ដល់ជំនួយមិនច្រើនដូចការរំពឹងទុក។

លោក សុខ ជំនោ បញ្ជាក់ថា គម្រោងរបស់លោកមិនទាន់រំពឹងថា នឹងទទួលបានចំណូលខ្ពស់ពីការបរិច្ចាគនាថ្ងៃធ្វើពិធីនោះទេ ប៉ុន្តែអ្វីដែលរំបឹងខ្លាំង គឺស្ពតរបស់ខ្លួន និងបទចម្រៀងរបស់ខ្លួន នឹងធ្វើឲ្យល្ខោនខោលត្រូវបានមហាជនចាប់អារម្មណ៍គាំទ្រខ្លាំងក្លា៕