ភ្នំពេញៈ ជារៀងរាល់ថ្ងៃហើយដែលមានករណីចោរឆក់នៅក្នុងទឹកដីខណ្ឌទាំង១២ ក្នុងរាជធានីភ្នំពេញនេះ ជាក់ស្ដែងជនសង្ស័យម្នាក់ បានធ្វើសកម្មភាពឆក់ទូរសព្ទ Iphone ពីស្ដ្រីម្នាក់ដែលកំពុងជិះម៉ូតូតាមផ្លូវ តែមិនបានសម្រេច ត្រូវយុវតីរងគ្រោះស្រែក រួចជិះគេចខ្លួនរហូតដល់ម្ដុំសាលាកូលាប ត្រូវបានប្រជាពលរដ្ឋ​សហការជាមួយសមត្ថកិច្ចដេញតាមឃាត់ខ្លួនបាន រួចវាយខ្នោះយកមកសាកសួរនៅអធិការដ្ឋាននរបាលខណ្ឌដូនពេញភ្លាមៗតែម្ដង។

ករណីឆក់ទូរសព្ទនេះបានកើតឡើងកាលបីវេលាម៉ោង៩និង៣០នាទីយប់ ថ្ងៃទី២៩ ខែសីហា ឆ្នាំ២០១៨ នៅចំណុចម្ដុំកន្លែងលក់ស៊ុប ជិតផ្សាររាត្រី ហើយត្រូវឃាត់បាននៅជាប់របងសាលាកូលាប​ គល់ស្ពានជ្រោយចង្វារ សង្កាត់ស្រះចក​ ខណ្ឌដូនពេញ​ រាជធានីភ្នំពេញ ​ ។

ជនសង្ស័យឈ្មោះ​ រិទ្ធី​ អាយុ១៨ឆ្នាំ ស្នាក់នៅម្ដុំគៀនស្វាយ ខេត្តកណ្តាល​ ដែលជិះម៉ូតូ​ Smash ស៊េរីចាស់​ (មិនចាំស្លាកលេខ) ។ ចំណែកទូរសព្ទ Iphone 6Plus បានប្រគល់ជូនយុវតីរងគ្រោះវិញហើយ ដែលជិះម៉ូតូ​ Icon​ មានទីលំនៅក្នុងរាជធានីភ្នំពេញ ។

យោងតាមសម្ដីរបស់យុវតីរងគ្រោះបានប្រាប់ឲ្យដឹងថា នៅមុនពេលកើតហេតុ រូបនាងបានកំពុងបើកម៉ូតូ Icon តែម្នាក់ឯងដោយធ្វើដំណើរពីផ្សារកណ្ដាល ទិសដៅពីត្បូងទៅជើង​ ខណៈដែលកំពុងដោតកាស និយាយទូរសព្ទុជាមួយម៉ាក់របស់នាង មិនដឹងថាមានជនសង្ស័យជិះតាមគាត់មកពីណាទេ លុះមកដល់ចំណុចកើតហេតុ​ ម្ដុំកន្លែងលក់ស៊ុប ជិតផ្សាររាត្រី ស្រាប់តែមានជនសង្ស័យម្នាក់ ជិះម៉ូតូ Smash មួយគ្រឿង មិនចាំស្លាកលេខ​ មកអែបក្បែរនាង ហើយធ្វើសកម្មភាពឆក់ទូរសព្ទ តែមិនបានសម្រេច​ទេ ព្រោះប្អូនស្រីក្រឡេកឃើញទាន់ រួចគេចផុត ភ្លាមនោះជនសង្ស័យបានព្យាយាមជិះគេចខ្លួន ចំណែកឯប្អូនស្រីស្រែក ចោរៗ​ ឆោឡោ​ផ្អើលដល់ប្រជាពលរដ្ឋនិងកម្លាំងអាវុធហត្ថដែលស្លៀកពាក់ស៊ីវិល នាំគ្នាជួយដេញតាម រហូតដល់ម្ដុំសាលាកូលាប ត្រូវបានប្រជាពលរដ្ឋ​សហការជាមួយសមត្ថកិច្ចនគរបាល​ខណ្ឌដូនពេញ​ និងអាវុធហត្ថខណ្ឌដូនពេញ ស្ទាក់ចាប់បាន រួចវាយខ្នោះយកមកសាកសួរនៅអធិការដ្ឋាននរបាលខណ្ឌដូនពេញភ្លាមៗតែម្ដង

ក្រោយពេលកើតហេតុកម្លាំងនគរបាលព្រហ្ម​ទណ្ឌខណ្ឌដូនពេញ បាននាំជនសង្ស័យឡើងរថយន្ត​សារ៉ែន​របស់​អធិការរងនគរបាលខណ្ឌដូនពេញ យកទៅធ្វើការសួរនាំ និងចាត់ការតាម​នីតិវិធីច្បាប់៕