Post News Media ព័ត៌មានជាតិ ឆេះ​ម៉ូតូ​​មួ...

ឆេះ​ម៉ូតូ​​មួយគ្រឿង ទាំងកណ្ដាលយប់ នៅមុខសាលាចាក់អង្រែ

ភ្នំពេញ: មាន​ករណី​ភ្ញាក់​ផ្អើល​មួយ ដោយ​សារ​តែ​មាន​ម៉ូតូ​ Nex មួយ​គ្រឿង​ បាន​ឆាបឆេះយ៉ាង បន្ទាប់ពីកំពុងបើកបរតែម្នាក់ឯង ក្នុងទិសដៅ​ពី​ជើងទៅត្បូង ខណ:ដែលផ្លូវកោង ​និងធ្វើដំណើរក្នុងល្បឿនលឿន​ពេក ស្រាប់តែរអិលដួលដោយខ្លួនឯង បណ្ដាលឲ្យម៉ូតូអូសជាង១០ម៉ែត្រ បែកផ្កាភ្លើងឆាបឆេះឡើងតែម្ដង​ រីឯអ្នកបើកបម៉ូតូបានសន្លប់ស្ដូកស្ដឹងផងដែរ។

​ហេតុការណ៍​គ្រោះថ្នាក់ចរាចរណ៍​នេះបាន​កើត​ឡើង​នៅ​វេលា​ម៉ោង​១២និង០១នាទីយប់ រំលងអធ្រាត្រ​ ឈានចូលថ្ងៃទី១២ ខែកញ្ញា​ ឆ្នាំ២០១៨នេះ ត្រង់ចំណុចមុខសាលារៀនចាក់អង្រែក្រោម តាមផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ​ រាជធានីភ្នំពេញ​ ។

បើតាមប្រភពព័ត៌មានពីប្រជាពលរដ្ឋដែលធ្វើដំណើរ​ឆ្លងកាត់​ ដែលជាអ្នកឃើញហេតុការណ៍នោះដោយចៃដន្យ​ បានរៀបរាប់​ប្រាប់ថា នៅមុនកើតហេតុបន្តិច​ គាត់បានឃើញម៉ូតូ​ Nex មួយ​គ្រឿង​ ពណ៌ស (មិនចាំស្លាកលេខ​) បើកបរដោយយុវជនម្នាក់ ទិសដៅ​ពី​ជើងទៅត្បូង លុះមកដល់ចំណុចកើតហេតុ​ ដែលជាផ្លូវកោង ​ខណ:ដែលធ្វើដំណើរក្នុងល្បឿនលឿន​ពេក ស្រាប់តែរអិលដួលដោយខ្លួនឯង អូសជាង១០ម៉ែត្រ​ បែកផ្កាភ្លើងឆាបឆេះឡើងតែម្ដង។ ចំណែកឯយុវជនដែលជាអ្នកបើកបម៉ូតូ បានសន្លប់ស្ដូកស្ដឹងផងដែរ ។
ភ្លាមនោះក៏ឃើញមានកម្លាំងប៉ូលិសដែលកំពុងល្បាតបានមកដល់កន្លែងកើតហេតុដែរ ទើបនាំគ្នាចុះមកបាច់ទឹកភ្លៀងដែលដក់នៅក្បែរនោះដើម្បីជួយពន្លត់ បានទាន់ពេលវេលាផងដែរ ដោយខូចខាតឆេះរោល​បន្តិចបន្តួច​ប៉ុណ្ណោះ ចំណែកឯយុវជនដែលជាអ្នកបើកបម៉ូតូ ដែលសន្លប់នោះ បានងើបដឹងខ្លួនហើយដោយគ្រាន់តែរងរបួសរលោតដៃ​រលោតជើងប៉ុណ្ណោះ។

ក្រោយ​ពេលកើតហេតុ​យុវជនរងគ្រោះបានទាក់ទងទៅមិត្តភក្តិឲ្យមកដឹកយកទៅគ្លីនិកឯកជន​ដើម្បីលាងរបួស​ និងម៉ូតូយកទៅជាមួយគ្នាផងដែរ៕