តាកែវៈ ​លោកឧត្តមសេនីយ៍ត្រី សួន ផុន ស្នងការរងខេត្តតាកែវ ទទួលផែនព្រហ្មទណ្ឌ បានប្រាប់ Post News ថា
កាលពីរសៀលថ្ងៃទី១៨ ខែធ្នូ ឆ្នាំ២០១៨ ជនសង្ស័យ៣នាក់ ត្រូវបានសមត្ថកិច្ចឃាត់ខ្លួន ពាក់ព័ន្ធនឹងករណីហិង្សាប៉ុនប៉ងមនុស្សឃាត ក្រោយធ្វើសកម្មភាពកាប់សិស្សវិទ្យាល័យព្រៃល្វា២នាក់ រងរបួសធ្ងន់ ​បន្ទាប់ពីធ្វើការសាកសួរជនដៃដល់គឺមានតែម្នាក់ ចំណែក២នាក់ទៀតជាសាក្សីតែប៉ុណ្ណោះ។

គួររំលឹកផងដែរថា កាលពីវេលាម៉ោង៥ល្ងាច ថ្ងៃទី១៧ ខែធ្នូ ឆ្នាំ២០១៨ មានករណីសិស្ស​វិទ្យាល័យព្រៃល្វា២នាក់ ត្រូវសិស្សវិទ្យាល័យភ្ញីមាស​ជិះម៉ូតូប្រដាប់ដោយដាវដេញកាប់ បណ្តាលឲ្យរងរបួសធ្ងន់ នៅ​មុខសាលាវិទ្យាល័យព្រៃល្វា ភូមិព្រៃល្វាលិច ឃុំព្រៃល្វា ស្រុកព្រៃកប្បាស ខេត្តតាកែវ។

ជនរងគ្រោះ​មានឈ្មោះ ផុន ម៉ានុ ភេទប្រុស អាយុ១៨ឆ្នាំ រស់នៅភូមិកញ្ជិល ឃុំកំពង់រាប ស្រុកព្រៃកប្បាស ខេត្តតាកែវ (រងរបួសធ្ងន់) និងទី២ឈ្មោះ ខន ឈុយ ភេទប្រុស អាយុ១៨ឆ្នាំ រស់នៅភូមិក្លែងកង់ ឃុំកំពង់រាប ស្រុកព្រៃកប្បាស ខេត្តតាកែវ (រងរបួសស្រាល)។
មូលហេតុ ផឹកស្រវឹង ខណ:ដែលមានកម្មវិធីសម្ភោធទីចាត់ការនៅវិទ្យាល័យខាងលើ។

បច្ចុប្បន្ន ជនសង្ស័យត្រូវបានសមត្ថកិច្ចបញ្ជូនទៅតុលាការព្រឹកមិញនេះ ដើម្បីដោះស្រាយតាមនីតិវិធីច្បាប់៕

មតិយោបល់