ព័ត៌មានជាតិ

ស្រីស្អាត​ម្នាក់​បើករថយន្ត​ក្នុងស្ថានភាព​ស្រវឹង​យ៉ាង​លឿនបុក​ពីក្រោយ​រថយន្ត​មួយគ្រឿង​ទៀត បណ្ដាល​ឲ្យ​រេ​ចង្កូត​ឡើងសួនច្បារ​ពុះ​ចែក​ទ្រូងផ្លូវ និង​បុក​បង្គោល​ភ្លើង​បំភ្លឺផ្លូវកាលពីយប់មិញនៅខណ្ឌដង្កោសង្ស័យមាននគរបាលខណ្ឌទួលគោក១រូបអន្តរាគមន៍

ភ្នំពេញ: គ្រោះថ្នាក់ចរាចរណ៍នេះ រថយន្ត​បង្ក​បាន​បើក​រត់គេច​រហូត ត្រូវបាន​បងប្អូន​ប្រជាពលរដ្ឋ និង​សមត្ថកិច្ច​នាំគ្នា​ដេញចាប់​ឃាត់​បាន​នៅមុខ​សាលាសង្កាត់​ដង្កោ​ កាលពី​វេលា​ម៉ោង​១១​យប់ ថ្ងៃ ទី​៩ ខែកុម្ភ: ឆ្នាំ​២០១៩​នៅ​លើកំណាត់​ផ្លូវ​២១៧ ស្ថិតក្នុង​ភូមិ​ថ្មី សង្កាត់​ដង្កោ ខណ្ឌដង្កោ រាជធានី​ភ្នំពេញ​។

​ប្រភពព័ត៌មាន​ពី​កន្លែងកើតហេតុ​បាន​ឲ្យ​ដឹងថា នៅមុន​កើតហេតុ គេ​ឃើញ​រថយន្ត TOYOTA PRIUS ២​គ្រឿង ពណ៌​ស​ដូចគ្នា ដោយ​រថយន្ត​បង្ក​ពាក់​ស្លាក​លេខ ភ្នំពេញ 2AB 2880 បើកបរ​ដោយ​នារី​ម្នាក់ ក្នុងស្ថានភាព​ស្រវឹង ធ្វើដំណើ​តាម​បណ្ដោយ​ផ្លូវ​២១៧ ទិសដៅ​ពី​ត្បូង​ទៅ​ជើង ក្នុង​ល្បឿន​យ៉ាងលឿន ប្រដេញ​តាម​រថយន្ត​មួយគ្រឿង​ទៀត ពាក់​ស្លាក​លេខ​ភ្នំពេញ 2AS-6205 បើកបរ​ដោយ​បុរស និង​រួម​ដំណើរ​ប្រុស​ស្រី​៦​នាក់ ធ្វើដំណើរ​តាម​បណ្ដោយ​ផ្លូវ​២១៧ ទិសដៅ​ស្រប​ទិស​គ្នា លុះ​មកដល់​ចំណុចកើតហេតុ​ខាងលើ ស្រាប់តែ​ជ្រុល​ទៅបុក​ពីក្រោយ​ចំ​ពេញទំហឹង បណ្ដាល​ឲ្យ​រថយន្ត PRIUS មាន​ប្រុស​មាន​ស្រី​នោះ​ក៏​រេ​ចង្កូត​ឡើង​ទៅលើ​សួនច្បារ​ពុះ​ចែក​ទ្រូងផ្លូវ និង​បុក​បង្គោល​ភ្លើង​បំភ្លឺ​ផ្លូវ​មួយ​ដើម បាក់​រាប​ដល់​ដី ធ្វើ​ឲ្យ​ឆ្លង​ចរន្ត​ភ្លើង​ប៉ះ​ឆក់​ផងដែរ និង​រងរបួស​ស្រាល​ស្ត្រី​ម្នាក់ ចំណែក​នារី​ដែល​ស្រវឹងស្រា​បើករថយន្ត​បង្ក​នោះ មិន​ព្រម​ឈប់​ទេ នៅតែ​បន្ត​បើក​ទៅមុខទៀត បំណង​បើក​រត់គេច​រហូតដល់​មុខ​សាលាសង្កាត់​ដង្កោ ត្រូវបាន​បងប្អូន​ប្រជាពលរដ្ឋ និង​សមត្ថកិច្ច​នាំគ្នា​ជួយ​ដេញចាប់​ឃាត់​បាន តែ​រូបនាង​មិន​ព្រម​ចុះ​ពីលើ​រថយន្ត​ទេ​។​

​ស​មត្ថកិច្ចថា នារី​ដែលជា​អ្នកបើកបរ​បង្ក​ស្រវឹងស្រា​ជោក​ ក្រោយពី​បង្កហេតុ​រួច ប៉ូលិស​បាន​ហៅ​ទៅធ្វើ​ការសាកសួរ នៅ​ប៉ុស្តិ៍នគរបាល​ដង្កោ​។ ចំណែក​រថយន្ត​ទាំង​២​គ្រឿង យកទៅ​រក្សាទុក​នៅ​ការិយាល័យ​ចរាចរណ៍​ផ្លូវគោក នៃ​ស្នងការ​នគរបាល​រាជធានី​ភ្នំពេញ ដើម្បី​រង់ចាំ​ធ្វើការ​ដោះស្រាយ​គ្នា និង​សង​ការខូចខាត​ទ្រព្យសម្បតិ្ត​សាធារណ: របស់​រដ្ឋ​តាមផ្លូវ​ច្បាប់​។ដោយឡែកនៅមុនពេលនគរបាលយករថយន្តទៅ​រក្សាទុក​នៅ​ការិយាល័យ​ចរាចរណ៍​ផ្លូវគោក នៃ​ស្នងការ​នគរបាល​រាជធានី​ភ្នំពេញគេឃើញមានមន្ត្រីនគរបាល១រូបដែលគេស្គាល់ថាគាត់ធ្វើការនៅទឹកដីខណ្ឌទួលគោកបានហៅទូរសព្ទខ្វែងខ្វាត់ឆ្លេឆ្លាដើរទៅមកសង្ស័យកំពុងចូលខ្លួនអន្តរាគមន៍ក្នុងរឿងខាងលើ៕

មតិយោបល់