ភ្នំពេញៈ នៅថ្ងៃទី១១ កក្កដាខាងមុខនេះ ស្ថានីយទូរទស្សន៍ PNN នឹងដល់ពិធីគម្រប់ខួប១ឆ្នាំរបស់ខ្លួន បន្ទាប់ពីបើកដំណើរការផ្សាយជាសាធារណៈ។ ក្រៅពីឃើញវត្តមានតារាល្បីៗរបស់ប៉ុស្ដិ៍លេខ៣ថៃ របស់តារាហុងហុងប្រចាំនៅទូរទស្សន៍TVB និងតារាល្បីៗនៅកម្ពុជាជូនពរក្នុងប៉ុន្មានថ្ងៃនេះ ស្ថានីយ៍ទូរទស្សន៍ PNNក៏បានប្រកាសផ្សាយនូវកម្មវិធីប្រកួតប្រជែងក្រោយប្រារព្ធខួបមួយឆ្នាំ ដើម្បីបង្កើនប្រជាប្រិយភាពផងដែរ។

បើមិនឃើញវីដេឃ្លីបជូនពរពីសំណាក់តារាល្បីៗកម្ពុជា ថៃ និងហុងកុង គេប្រាកដជាមិនបានដឹងថា ទូរទស្សន៍PNN ឈានដល់គម្រប់១ឆ្នាំនៅថ្ងៃទី១១ កក្កដានេះឡើយ។ តារាល្បីៗនៅក្នុងភាពយន្តថៃរួមមាន លោក Mark Prin, លោក Ken Phuphoom, លោក James Jirayuth, លោក Great Warinthorn, និងលោក Ken Teeradechត្រូវគេឃើញជូនពរPNN សម្រាប់ខួបមួយឆ្នាំ។ ចំពោះតារាហុងកុងរបស់ TVB វិញ ក៏មានការជូនពរពីលោកVincent Wong និងអ្នកនាង Nancy Wu ផងដែរ។ សម្រាប់តារាកម្ពុជារួមមានកញ្ញាតូតា កញ្ញា ទឹម រដ្ឋា, លោក លឹម ជាឡាយ, លោក អ៊ុន សុទ្ធា, កញ្ញា សុផាឡែន, លោក សន កាយ៉ាឌី, កញ្ញា ឃីង សុរិយា, និងកញ្ញា ឡាយ សម្ផស្សជាដើម ក៏ជូនពរស្ថាប័ននេះមិនខុសគ្នាផងដែរ ខណៈដែលឈុតឆាកជូនពរទាំងនោះត្រូវគេឃើញចាក់ផ្សាយបណ្ដាក់គ្នានៅចន្លោះម៉ោងនីមួយៗ។ មានការបញ្ជាក់ថាវីដេអូជូនពររបស់តារាល្បីៗនឹងត្រូវចាក់ផ្សាយសរុបគ្នានៅថ្ងៃអាទិត្យទី១០ កក្កដា ចាប់ពីម៉ោង៩ ដល់ម៉ោង១០យប់ និងថ្ងៃចន្ទ ទី១១ កក្កដា ចាប់ពីម៉ោង៧ ព្រឹក រហូតដល់ម៉ោង១០យប់ក្នុងពេលខាងមុខ។

ជាមួយនឹងការគម្រប់ខួប១ឆ្នាំនេះ PNN បានប្រកាសថាខ្លួននឹងផលិតកម្មវិធីពិសេសអបអរដល់ខួបរបស់ខ្លួនឲ្យមានលក្ខណៈពិសេស។ ជាក់ស្ដែងនៅថ្ងៃអាទិត្យក្នុងកម្មវិធីSuper Sunday Concert ស្អែកនេះ លោក ខេម, អ្នកនាង លី អ៊ីវ៉ាធីណា, កញ្ញា ង៉ែត សូរង្ស៊ី និងក្រុមកំប្លែងGL នឹងត្រូវបានអញ្ជើញឲ្យចូលរួមអបអរខួបមួយឆ្នាំរបស់ខ្លួន។ កម្មវិធីថ្មីៗជាច្រើនក៏ត្រូវគេឃើញប្រកាសឡើង ដើម្បីធ្វើការប្រកួតប្រជែងប្រជាប្រិយភាពក្នុងឆ្នាំទី២របស់ខ្លួនទៀតក្នុងវិស័យសោតទស្សន៍នៅកម្ពុជា។

គួរបញ្ជាក់ផងដែរ ថា កាលពីថ្ងៃទី ១១ កក្កដា ២០១៥ ស្ថានីយ៍ទូរទស្សន៍ភីអិនអិនបានបើកដំណើរការ បើទោះជាស្ថាប័នមួយនេះ នៅមិនទាន់មានពិធីសម្ពោធផ្លូវការនៅឡើយ។ កម្មវិធីដែលមានប្រជាប្រិយរបស់ស្ថាប័ននេះ រួមមានកម្មវិធីព័ត៌មាន កម្មវិធីភាពយន្តភាគថៃ,កម្មវិធី«ស៊ីអារម្មណ៍», កម្មវិធី«ការណាត់ជួបដ៏អស្ចារ្យ» និងកម្មវិធី«វេទិការព្រហ្មម៉ាញ»ជាដើម។ ក្រោយបញ្ចប់ខួប១ឆ្នាំរបស់ខ្លួន មន្ត្រីទូរទស្សន៍ PNN បានអះអាងថាកម្មវិធីប្រកួតប្រជែងជាច្រើននឹងត្រូវរំលេចឡើងដើម្បីប្រជែងយកការគាំទ្រឲ្យបានពេញទំហឹង៕