ភ្នំពេញ: បុរសអ្នករត់ PassApp ម្នាក់ មានអាការ:មិនស្រួលខ្លួន ត្រូវប្រជាពលរដ្ឋឃើញក៏ជួយ តែមិនទាន់បានសង្គ្រោះផង ក៏ដាច់ខ្យល់ស្លាប់តែម្ដង បង្កការភ្ញាក់ផ្អើលកាលពីវេលាម៉ោង១ និង៣០នាទីរសៀលថ្ងៃទី១៨ ខែមិនា ឆ្នាំ២០១៩ ស្ថិតក្នុងវត្តកៀនឃ្លាំង ភូមិកៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
សពបុរសខាងលើមានឈ្មោះ ភឿន សោភ័ណ អាយុ៤២ឆ្នាំ មុខរបររត់ PassApp ស្នាក់នៅម្តុំវត្តទួលសង្កែ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ មានលំនៅអចិន្ត្រៃផ្ទះលេខ២៨៦ ផ្លូវ១១ ភូមិព្រែកខ្សាយ ឃុំព្រែកខ្សាយ ក ស្រុកពាមរក៍ ខេត្តព្រៃវែង។
តាមប្រភពព័ត៌មានពីប្រជាពលរដ្ឋ ឲ្យដឹងថា នៅមុនពេលកើតហេតុ ប្រជាពលរដ្ឋ បានហៅជនរងគ្រោះ ឲ្យឌុបលោកយាយម្នាក់ តែត្រូវបុរសខាងលើ ប្រាប់ថាមានអាការ:មិនស្រួលខ្លួន វឹលមុខក្រោយមកប្រជាពលរដ្ឋ បានជួយបញ្ចុកទឹកក្រូចឆ្មា និងកោសខ្យល់ បានមួយសន្ទុះស្រាប់តែប្រកាច់ដាច់ខ្យល់ស្លាប់តែម្តង។
ក្រោយកើតហេតុ សមត្ថកិច្ចមូលដ្ឋានបានមកដល់កន្លែងកើតហេតុ ហើយទាក់ទងសមត្ថកិច្ចជំនាញ មកធ្វើកោសល្យវិច័យ សន្និដ្ឋានថា បុរសខាងលើខ្យល់គគាំងបេះដូង បណ្តាលឲ្យស្លាប់ រួចប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕
មតិយោបល់