(មណ្ឌលគិរី) ៖ ប្រជាពលរដ្ឋរងគ្រោះធម្មជាតិដោយសារខ្យល់កន្ត្រាក់ដួលរលំផ្ទះនៅក្នុងឃុំក្រង់តេះនិងឃុំពូជ្រៃ នៅក្នុងស្រុកពេជ្រាដា ចំនួន៦៥គ្រួសារ បានទទួលអំណោយមនុស្សធម៌ និងថវិកាមួយចំនួនរបស់សាខាកាកបាទក្រហមកម្ពុជាខេត្តមណ្ឌលគិរី តាមរយះ លោក ស្វាយ សំអ៊ាង អភិបាល នៃគណៈអភិបាលខេត្ត និងជាប្រធានកិត្តិយសសាខាកាកបាទក្រហមកម្ពុជាខេត្តមណ្ឌលគិរី នៅរសៀលថ្ងៃទី១៨ ខែមេសាឆ្នាំ២០១៦ នេះ។
គួរបញ្ជាក់ថា កាលពីរសៀលថ្ងៃទី១៧ ខែមេសា ឆ្នាំ២០១៦នេះ នៅវេលាម៉ោង៣នឹង៤០នាទី នៅក្នុងស្រុកពេជ្រាដា មានឃុំចំនួន០២រងនៅការដួលរលំផ្ទះបណ្តាលឲ្យខូចខាត ដោយសារខ្យល់កន្ត្រាក់ គឺឃុំពូជ្រៃ ចំនួន២៩គ្រួសារ មានអ្នករងរបួស ស្រាលចំនួន០៣នាក់ រងរបួសធ្ងន់ចំនួន០១នាក់ និងឃុំក្រង់តេះចំនួន៣៦គ្រួសារ។
នៅក្នុងពិធីនោះដែរ លោក ស្វាយ បានមានមតិសំណេះសំណាលពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់ប្រជាពលរដ្ឋដែលរងគ្រោះដោយសារខ្យល់កន្ត្រាក់ ព្រមទាំងសំណូមពរឲ្យប្រជាពលរដ្ឋត្រូវថែរក្សាសុខភាពឲ្យបានល្អ និងខិតខំដាំដំណាំរួមផ្សំ ដើម្បីស្តាជីវភាពរស់នៅឡើងវិញ៕
មតិយោបល់