ផ្ទះ ព័ត៌មានជាតិ Update៖ ករណីប...

Update៖ ករណីបុករះរងការខូចខាតរថយន្ត និងរ៉ឺម៉កម៉ូតូអស់ជាច្រើនគ្រឿង ហើយបើករត់នោះ សង្ស័យជាកូនមន្ត្រីជាន់ខ្ពស់ មានងារជាឯកឧត្ដម

0

ភ្នំពេញ: នៅវេលាម៉ោង ៤ និង ២០នាទីរសៀលថ្ងៃទី៤ ខែវិច្ឆិកា ឆ្នាំ ២០១៩ ត្រង់ចំណុចខាងមុខក្រសួងរ៉ែ និង ថាមពល តាមបណ្តោយផ្លូវលេខ ៥១ (ផ្លូវប៉ាស្ទ័រ) ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ មានករណីគ្រោះថ្នាក់ចរាចរណ៍ មួយ រវាងរថយន្តបុករះរថយន្តជាច្រើនគ្រឿង និងរ៉ឺម៉ក ម៉ូតូកង់បីឥណ្ឌា បណ្ដាលឲ្យការខូចខាត។

រថយន្តបង្ក ជិះគ្នា ៣នាក់ ម៉ាកលុចស៊ីស IS300 ធុនតូច ពណ៌ស ពាក់ស្លាកលេខ ភ្នំពេញ ២AF-៩៩៦៩ បើកបរដោយនារីម្នាក់ មិនស្គាល់អត្ត សញ្ញាណ មានអាយុប្រហែល ២៨ឆ្នាំ ក្រោយកើតហេតុ ទាំងអ្នកបើក និងអ្នករួមដំណើរ ក្រោយកើតហេតុ បានគ្នារត់គេចខ្លួនបាត់។

ចំណែករថយន្តរងគ្រោះចំនួន ៤គ្រឿង និង រ៉ឺម៉កម៉ូតូកង់បី ឥណ្ឌា ២គ្រឿង រួមមាន៖
១-រថយន្តម៉ាក RANGER ពណ៌ស ពាក់ស្លាកលេខ ភ្នំពេញ ២AP-២២៧៧
២-រថយន្តម៉ាក Mazda ពាក់ស្លាកលេខ រដ្ឋ ២-១២១០
៣- រថយន្តម៉ាក Mazda ពណ៌ស ពាក់ស្លាកលេខ រដ្ឋ
៤-រថយន្តស៊េរីទំនើបម៉ាក LAND ROVER ពណ៌ខ្មៅ ពាក់ស្លាកលេខ ភ្នំពេញ ២U-០០៨៧
-រ៉ឺម៉កម៉ូតូកង់បីឥណ្ឌាចំនួន ២គ្រឿង ពណ៌ស មិនចាំ ស្លាកលេខ ។

ដំណើររឿង៖ មុនពេលកើតហេតុ គេឃើញ រថយន្តស៊េរីទំនើបមួយគ្រឿង ម៉ាកលុកស៊ីស IS300ខាងលើ ជិះគ្នា ៣នាក់ បើកបរដោយនារីម្នាក់ ធ្វើដំណើរពីជើងទៅត្បូងតាមបណ្តោយផ្លូវប៉ាស្ទ័រ (ផ្លូវលេខ៥១) ។ មកដល់កន្លែងកើតហេតុ ស្រាប់តែមានរថយន្ត មួយគ្រឿង ម៉ាក CRV ពណ៌ខ្មៅ មិនចាំស្លាកលេខ បុកគូទរថយន្តលុចស៊ីសបន្តិច ហើយបើកបត់ឆ្វេងគេចខ្លួនបាត់។

ខណ:នោះ សង្ស័យនារីជាអ្នកបើករថយន្តលុចស៊ីស ភ័យពេក ឬភ្ញាក់ក៏មិនដឹង ស្រាប់តែជាន់ហ្គែ បន្ថែមល្បឿន ជ្រុលទៅបុកកង់បីឥណ្ឌាមួយគ្រឿង ដែលកំពុងតែ បើកបរពីមុខ បណ្តាលឱ្យក្រឡាប់ ខ្ទាតទៅបុកផ្ទុបនឹងរថយន្តម៉ាក RANGER និងរថយន្តម៉ាក Mazda ដែលចតនៅស្ងៀម។

បន្ទាប់មករថយន្តបង្ក មិនទាន់អស់ល្បឿនទេ បានបន្តទៅបុកកង់បីឥណ្ឌា មួយគ្រឿងទៀត ដែលកំពុងបើកបរ ហើយបន្តទៅបុករថយន្តម៉ាក Mazda មួយគ្រឿងផ្សេងទៀត រួមទាំងបុក រថយន្តស៊េរីទំនើបម៉ាក LAND ROVER ដែលចតនៅខាងមុខក្រសួងរ៉ែ និង ថាមពល ទើបទៅមុខលែងរួច ។

ក្រោយកើតហេតុ សមត្ថកិច្ច ចុះមកដល់ធ្វើការវាស់វែង និងយកវត្ថុតាង ទៅរក្សាទុកនៅការិយាល័យនគរបាលចរាចរណ៍ផ្លូវគោកនៃ ស្នងការនគរបាល រាជធានីភ្នំពេញ ដើម្បីធ្វើការដោះស្រាយពេលក្រោយ។

សូមបញ្ជាក់៖ ករណីខាងលើនេះ តាមប្រភពព័ត៌មានលួចបង្ហើបប្រាប់ Post News ថា រថយន្តដែលបុករត់នោះ សង្ស័យជាកូនមន្ត្រីជាន់ខ្ពស់ មានងារជាឯកឧត្ដម។

សូមបងប្អូនប្រជាពលរដ្ឋគោរពច្បាប់ចរាចរណ៍ទាំងអស់គ្នា កុំបើកបរក្នុងស្ថានភាព ស្រវឹង ហើយបើបុកគេ សូមឲ្យទទួលខុសត្រូវផង កុំឲ្យដូចរឿងខាងលើនេះ៕

Loading...

Leave a Reply

This site uses Akismet to reduce spam. Learn how your comment data is processed.