ព្រះសីហនុៈ នៅវេលាម៉ោង ១២និង៤៥នាទីរំលងអធ្រាត្រឈានចូលថ្ងៃទី៣ ខែមករា ឆ្នាំ២០២០ មានករណីគ្រោះថ្នាក់ចរាចរណ៍ ស្ថិតតាមបណ្ដោយផ្លូវជាតិលេខ៤ ចន្លោះគីឡូម៉ែត្រ១៧៩-១៨០ ត្រង់ចំណុចមុខវិទ្យាល័យវាលរេញ ភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ។

រថយន្តម៉ាក LEXUS LX ៤៧០ ពណ៌ខ្មៅ ពាក់ស្លាកលេខ ភ្នំពេញ 2N-2111 អ្នកបើកបរឈ្មោះ នាក់ ចយ ភេទប្រុស អាយុ ៥៣ឆ្នាំ មានទីលំនៅឃុំទំនប់រលក ស្រុកស្ទឹងហាវ ខេត្តព្រះសីហនុ ធ្វើដំណើរពីភ្នំពេញទៅក្រុងព្រះសីហនុ ស្រាប់តែមកដល់ចំណុចកើតហេតុ បានបុករបាំងទ្រូងផ្លូវពេញទំហឹង បណ្ដាលឲ្យរថយន្តឆាបឆេះ និងអ្នកបើករបស្លាប់ភ្លាមនៅកន្លែងកើតហេតុតែម្ដង។

បញ្ជាក់៖ ករណីនេះ សមត្ថកិច្ចជំនាញចុះជួយសង្គ្រោះជនរងគ្រោះ និងជួយពន្លត់អគ្គិភ័យរលត់ទាំងស្រុង។

ក្រោយពេលកើតហេតុសពត្រូវបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី រីឯវត្ថុតាង ត្រូវបានយកមករក្សាទុកនៅអធិការដ្ឋាន ស្រុកព្រៃនប់៕