បន្ទាយមានជ័យៈ ​ គ្រោះថ្នាក់ចរាចរណ៍មួយកើតឡើងដោយ​រថយន្តម៉ាក​ LANDCRUISER ចងកំហឹងបុកទាំងកំរោលជាមួយ​រថយន្ត​ដឹកអេសស្កា ពេញ​ទំហឹង បណ្តាល​ឲ្យ​​របួសធ្ងន់ម្នាក់ កាល​វេលាម៉ោង៨និង១៥នាទី ថ្ងៃទី៣០ ខែកក្កដា ឆ្នាំ២០១៦ លើកំណាត់ផ្លូវជាតិលេខ៦ ត្រង់ចំណុចមុខគ្រឹះស្ថានមីក្រូហិរញ្ញវត្ថុ ( អិលអូអិលស៊ី ) ស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។

ប្រភពឲ្យដឹងថា ហេតុការណ៍ខាងលើនេះ បង្កឡើង​ដោយរថយន្តម៉ាក LANDCRUISER ពណ៌ស្លែ ពាក់ស្លាកលេខភ្នំពេញ2Y.7522 បើកបរដោយឈ្មោះ ជាង អាន ភេទ ប្រុស អាយុ៣២ឆ្នាំ រស់នៅភូមិប៉ោយចាស់ ឃុំព្រះនេតត្រព្រះ ស្រុកព្រះនេត្រព្រះ ខេត្តបន្ទាយមានជ័យ បើកក្នុងទិសដៅពីកើតទៅលិចបុកពីក្រោយរថយន្ត០១គ្រឿងទៀត ដែលចតនៅស្ងៀមដឹកអេសស្កា ម៉ាកMITSUBISHI ពាក់ស្លាកលេខ ភ្នំពេញ 3A-1074 ពេញទំហឹងលានដូចរន្ទះ បណ្តាល​ឲ្យមនុស្សរងរបួសធ្ងន់ និងរងការខូចខាតយ៉ាងដំណុំ។

ប្រភពបន្តថា លោកភឿក ព្រហ្ម មេបញ្ជាការស្ដីទីមូលដ្ឋានកងរាជអាវុធហត្ថក្រុងសិរីសោភ័ណ បានឲ្យដឹងថា ម្ចាស់រថយន្តLANDCRUISER ឈ្មោះសឿន សីហា ភេទប្រុស អាយុ២០ឆ្នាំ រស់នៅខេត្តបាត់ដំបង ​រងរបួស​ធ្ងន់ធ្ងរ​ ចំណែកអ្នកបើកបររថយន្តពុំមានរងរបួសទេ។ បច្ចុប្បន្ន​ ​រថយន្តទាំងពីរ
ត្រូវ​បាននគរបាលចរាចរណ៍ខេត្តយកទៅរក្សាទុកនៅស្នងការខេត្ត៕