បន្ទាយមានជ័យ: ជាថ្មីម្តងទៀតនៅថ្ងៃទី០១ សីហា ឆ្នាំ២០១៦ មន្ត្រីជំនាញសាខាកាំកុងត្រូលខេត្តបន្ទាយមានជ័យ បានសហការជាមួយសមត្ថកិច្ចចម្រុះ ចុះអប់រំដល់សិស្សានុសិស្សចំនួន៣០០នាក់ នៅវិទ្យាល័យម៉ាឡៃ និងអាជីវករផ្សារក្នុងទីរួមស្រុកម៉ាឡៃ ស្តីពីគ្រោះថ្នាក់ម្ហូបអាហារ និងវិធីបង្ការ។
លោក ហុង លៀង អនុប្រធានទី១ ទទួលបន្ទុកទីផ្សារនៃសាខាកាំកុងត្រូលខេត្តបន្ទាយមានជ័យ បានឲ្យដឹងថា ដោយទទួលបញ្ជាពី លោក ស៊ាន ស៊ីណាត ប្រធានសាខាកាំកុងត្រូល បានដាក់នូវផែនការ ដល់មន្ត្រីរបស់ខ្លួន ពង្រឹងការត្រួតពិនិត្យការនាំចូលទំនិញផ្សេងៗពីប្រទេសថៃ ទាំងច្រកអន្តរជាតិ និងច្រកតំបន់ នៅថ្ងៃទី១សីហា ក៏បានចុះផ្សព្វផ្សាយរួមមាន ការចូលរួមពីនគរបាលប្រឆាំងបទល្មើសខេត្ត ក្រសួង និងមន្ត្រីមន្ទីរពាណិជ្ជកម្មក្នុងគោលបំណងអប់រំ ចំណេះដឹងដល់សិស្សានុសិស្ស ឲ្យស្គាល់ពីប្រភេទទំនិញខូចគុណភាព របៀបមើលពីសុពលភាពទំនិញ ប្រភេទទំនិញ ដែលច្បាប់ហាមឃាត់ មិនអនុញ្ញាត ឲ្យលក់លើទីផ្សារ។
ក្នុងនោះលោក លន់ ស៊ីថា អនុប្រធានសាខាកាំកុងត្រូល ទទួលបន្ទុកអប់រំផ្សព្វផ្សាយបានរំពឹងទុកថា ក្រោយទទួលបានការណែនាំសិស្សានុសិស្ស ប្រជាពលរដ្ឋ និងកាន់តែយល់ដឹងខ្ពស់ អាចបញ្ឈប់ការទទួលទាននូវចំណីអាហារណាដែលគ្មានគុណភាព និងហាមឃាត់ ហើយបន្តទៅផ្សព្វផ្សាយដល់ ក្រុមគ្រួសារ មិត្តភក្តិ ពលរដ្ឋដទៃទៀត និងសហគមន៍ ដែលពួកគេរស់នៅ ពេលនោះ ពួកគាត់ និងឈប់ប្រើប្រាស់ ហើយទំនិញខូចគុណភាព ក៏គ្មានលើទីផ្សារ ។ លោក ក៏សំណូមពរដល់អាជីវករទាំងអស់កុំយកទំនិញដែលខូចគុណភាព ឬហួសកាលបរិច្ឆេទ មកលក់ នាំឲ្យខូចសុខភាពអ្នកទទួលទិញ និងម្យ៉ាងទៀតវាប្រឈមមុខនឹងផ្លូវច្បាប់ផ្ដន្ទាទោស។
ក្នុងការចុះត្រួតពិនិត្យទំនិញក្នុងផ្សារស្រុកម៉ាឡៃ បានរកឃើញនិងដកហូត នៅទឹកក្រូចហួសកាលបរិច្ឆេទ មួយចំនួន រឹបអូសយកមករក្សាទុក ដើម្បីរងចាំដុតកម្ទេចចោល៕
មតិយោបល់