ព័ត៌មានជាតិ

អគ្គិភ័យឆេះផ្ទះលក់គ្រឿងដែក​ និង​ គ្រឿង​អគ្គិសនី គិតជាទឹកប្រាក់ខាតបង់សរុបប្រហែល ១០ម៉ឺនដុល្លារ នៅផ្សារចំការគរ

បន្ទាយមានជ័យ: យោងតាមផេកការិយាល័យផ្សព្វផ្សាយតាមបណ្តាញសង្គម បានឲ្យដឹងថា ផ្ទះលក់គ្រឿងដែក​ និង​ គ្រឿង​អគ្គិសនី​ ១ខ្នង ត្រូវបានភ្លើងឆេះ ខ្ទេចខ្ទីស្ទើរអស់ទាំងស្រុង តែសំណាងត្រូវកម្លាំងចម្រុះ យករថយន្តពន្លត់អគ្គិភ័យចំនួន៣គ្រឿង និងប្រជាពលរដ្ឋ ចេញទៅជួយសង្គ្រោះបាញ់ទឹកពន្លត់ទាន់ពេលវេលា មិនរាលដាលដល់ផ្ទះអ្នកជិតខាង។

ហេតុការណ៍នេះ បានកើតឡើងនៅវេលាម៉ោង៧យប់ ថ្ងៃទី៦ ខែមេសា ឆ្នាំ២០២០ នៅចំណុចខាងត្បូងផ្សារចម្ការគរ ផ្លូវជាតិលេខ៥៦ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។

លោកវរសេនីយ៍ឯក ស៊ីឌី អធិការនគរបាលក្រុងសិរីសោភ័ណ បានឲ្យដឹងថា៖ ម្ចាស់ផ្ទះមានឈ្មោះ ប៉ោ​ ជា​ ភេទប្រុស​ អាយុ​ ៧៦ឆ្នាំ​ ប្រពន្ធ​ឈ្មោះ​ កែវ​ ហៀក​ អាយុ​ ៦៨ឆ្នាំ​ មុខរបរ​លក់គ្រឿងដែក​ និង​ គ្រឿង​អគ្គិសនី​ ស្ថិត​ក្នុង​ភូមិ​សូភី​ សង្កាត់កំពង់ស្វាយ​។

លោកបញ្ជាក់ឲ្យដឹងទៀតថា៖ ក្រោយពេលភ្លើងឆេះយ៉ាងសន្ធោសន្ធៅ ភ្លាមៗនោះ ម្ចាស់ផ្ទះបានរត់ចេញមកក្រៅឲ្យគេជួយ ស្របពេលនោះ មានប្រជាពលរដ្ឋ កម្លាំងនគរបាលក្រុង កម្លាំងអាវុធហត្ថ និងកម្លាំងនគរបាលខេត្ត រួមទាំងរថយន្តពន្លត់អគ្គិភ័យចំនួន៣គ្រឿង បានបាញ់ទឹកពន្លត់​ ដោយប្រើប្រាស់ពេលវេលា១ម៉ោង ទើបភ្លើងរលត់ទាំងស្រុង។

លោកអធិការបានបញ្ជាក់ឲ្យដឹងទៀតថា៖ សំណង់ដែលត្រូវភ្លើងឆេះនោះ ជាផ្ទះល្វែងជាន់ទី១​ ឆេះប្រហែលមកពីទុស្សេចរន្តអគ្គិសនី ចំណែក សម្ភារដែលខូចខាតនោះ បើតាមការឲ្យដឹងពីម្ចាស់គិតជាទឹកប្រាក់​ សរុប​ជាប្រាក់ប្រហែលជា​ ១០,០០០ដុល្លារ (ម៉ឺនដុល្លា)​៕

មតិយោបល់