ភ្នំពេញ: បុរសម្នាក់ស្រវឹងស្រា យកកាំភ្លើងជ័រភ្ជង់គេឯង បង្កឱ្យមានការភ្ញាក់ផ្អើលកាលពី វេលាម៉ោង ៨និង ១០នាទីយប់ នៅថ្ងៃ ទី ១១ ខែមេសា ឆ្នាំ ២០២០ ត្រង់ចំណុចផ្លូវបេតុងជាប់របងមន្ទីរពេទ្យរ៉ូយ៉ាល់ភ្នំពេញ នៅក្នុងភូមិសេ ប៉េ សេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

ជនរងគ្រោះនិងជនបង្កមិនត្រូវបានស្គាល់អត្តសញ្ញាណនោះទេ។

ប្រភពពីកន្លែងកើតហេតុបានឲ្យដឹងថាដំបូងឡើងគេឃើញ បុរសម្នាក់ស្រវឹងស្រាជិះម៉ូតូម៉ាកឌ្រីមសង់ ស៊េរីឆ្នាំ២០០៩ ពណ៌ខ្មៅ ពាក់ស្លាកលេខ ភ្នំពេញ1AF.3678ជិះតាមបណ្តោយផ្លូវបេតុងទឹសដៅពីជើងទៅត្បូង មកឈប់ ចំណុចកើតហេតុខាងលើ ហើយក៏បានដកកាំភ្លើងពីចង្កេះភ្ជង់ជនជាតិចិនម្នាក់ធ្វើឲ្យជនជាតិចិន ម្នាក់នោះភ័យរត់ចេញពីកន្លែងកើតហេតុ ខណៈពេលនោះស្រាប់តែមាន យុវជនម្នាក់ជាជនរងគ្រោះបានជិះម៉ូតូមកដល់កន្លែងកើតហេតុរៀបនឹងបត់ចូលផ្ទះទៅហើយ ក៏ត្រូវបានជនបង្ក ភ្ជង់និងគំរាមបាញ់ ធ្វើឲ្យគាត់ភ័យរាកនោមដាក់ខោ បង្កឱ្យមានការភ្ញាក់ផ្អើលដល់សមត្ថកិច្ចចុះមកអន្តរាគមន៍ចាប់ឃាត់ខ្លួនជនបង្កនោះទើបដឹងថាជាកាំភ្លើងជ័រទៅវិញ។

ក្រោយពីកើតហេតុសមត្ថកិច្ចក៏បាននាំខ្លួនជនបង្កនិងជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកថ្លាដើម្បីសួរនាំនិងធ្វើកំណត់ហេតុបញ្ជូនបន្តទៅអធិការដ្ឋានខណ្ឌសែនសុខចាត់ការណ៏ទៅតាមនីតិវិធី៕