ភ្នំពេញ: បញ្ហាភូមិ-ឃុំមានសុវត្ថិភាពជាកត្តាសំខាន់ បន្ទាប់ពីរដ្ឋាភិបាលបានដាក់បញ្ចូលឱ្យប្រើប្រាស់ផ្លូវការជាមួយគ្នានោះ ក្នុងចំណោមគោលនយោបាយទាំង៩ចំណុច គឺបទល្មើសល្បែងស៊ីសងហ្គេមអនឡាញជាកត្តាសំខាន់ ដែលប្រជាពលរដ្ឋចាប់អារម្មណ៍ជាងគេ ក៏ព្រោះតែល្បែងស៊ីសងអាចធ្វើឱ្យមនុស្សឈ្លកវង្វេងភ្លេចការងារ ភ្លេចបាយ ភ្លេចទឹក ភ្លេចការសិក្សា និងកែប្រែពីការចាញ់ល្បែងទៅជាបទល្មើស លួច ឆក់ ប្លន់ជាដើម។
ជាក់ស្តែងកាលម៉ោង០៨៖៣០នាទី ព្រឹកថ្ងៃទី០៤ សីហា ឆ្នាំ២០១៦ អាជ្ញាធរខណ្ឌបានចុះបង្ក្រាបហ្គេមអនឡាញចំនួន២ទីតាំង ដែលបង្កប់ផ្នាល់បាល់ខាងក្នុង និងធ្វើការដកហូតសម្ភារ: និងលុយមួយចំនួនធំ ស្ថិតនៅផ្ទះលេខ២៣ផ្លូវ១០១៩ ភូមិរោងចក្រ និងផ្ទះលេខសេ៣ផ្លូវ១៩៨៦ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ប្រភពឲ្យដឹងថា ប្រតិបត្តិការខាងលើនេះ ដឹកនាំដោយលោក សាំង សុភ:វិចិត្រ អភិបាលរងខណ្ឌតំណាងលោកអភិបាលខណ្ឌសែនសុខ លោក ញឹម ភារុណ មន្ត្រីសាលាខណ្ឌលោក ប៊ិន ចន្ថា ប្រធានសណ្តាប់ធ្នាប់ខណ្ឌ លោក ឃិន វិរះ ប្រធានសណ្តាប់ធ្នាប់សង្កាត់ភ្នំពេញថ្មី។
ប្រភពបន្តថា ម្ចាស់ទីតាំងទី១ ឈ្មោះអ៊ុ សីហា ភេទប្រុស អាយុ២៣ឆ្នាំ មុខរបរបើកទីតាំងហ្គេម និងស្នាក់នៅផ្ទះលេខ២៣ ផ្លូវ១០១៩ ភូមិរិងចក្រ សង្កាត់ភ្នំពេញថ្មី ខណ្ឌសែនសុខ ដកហូតសម្ភារ: ហ្គេមកុងព្យូទ័រ១២ ស៊ីវីយូ១០ម៉ាស៊ីនព្រីនធ័រចំនួន០១ និងលុយដុល្លារចំនួន ២៥៧ដុល្លារ លុយខ្មែរ ៤២០៦០០រៀល។ ម្ចាស់ទីតាំងទី២ឈ្មោះ ងន ច័ន្ទសេរីរ័ត្ន ភេទប្រុស អាយុ២៥ឆ្នាំ មុខរបរបើកទីតាំងហ្គេម ស្នាក់នៅផ្ទះ លេខសេ៣ផ្លូវ១៩៨៦ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ដកហូតសម្ភារ:ហ្គេមកុំព្យូទ័រចំនួន១៦ឈុត លុយដុល្លារ ៥១៣ដុល្លារ លុយខ្មែរចំនួន២២៣១៥០០រៀល។
សូមបញ្ជាក់ថា ប្រជាពលរដ្ឋក្នុងមូលដ្ឋានពិតជាមានការសាទរ ចំពោះចំណាត់ការរបស់លោកអភិបាលខណ្ឌសែនសុខ ទៅលើទីតាំងហ្គេមអនឡាញខាងលើនេះ។
បច្ចប្បន្ន សម្ភារ:ហ្គេមអនឡាញខាងលើត្រូវកម្លាំងនគរបាលដកហូតយកទៅរក្សាទុកនៅសាលាខណ្ឌសែនសុខ៕
មតិយោបល់