ព័ត៌មានជាតិ

លាន់ដូចរន្ទះ! រថយន្តផ្លាកលេខខេមរភូមិន្ទ០៩ ២-៥៤៦២ ប៉ះ lexus Rx 300 បណ្តាលឲ្យមនុស្ស៣នាក់ របួសធ្ងន់

ប៉ៃលិន:​ យោងតាមផេក ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា វេលាម៉ោង១៩និង៤០នាទីថ្ងៃសុក្រ​ ១២កើត ខែមិគសិរ ឆ្នាំជូត​ ទោស័ក ព.ស. ២៥៦៤ ត្រូវនឹងថ្ងៃទី២៧ ខែវិច្ឆិកា​ ឆ្នាំ២០២០ មានករណីគ្រោះថ្នាក់ចរាចរណ៍ កើតឡើង រវាងរថយន្តធុនស្រាល និងរថយន្តធុនស្រាល នៅលើផ្លូវជាតិលេខ៥៩ បើកបរច្រាសទិសគ្នា នៅចំណុចមណ្ឌលសុខភាពភ្នំស្ពង់ ស្ថិតភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ខេត្ដប៉ៃលិន ។

ករណីខាងលើនេះ បណ្តាលឲ្យខូចខាត រថយន្តចំនួន០២គ្រឿងកម្រិតធ្ងន់ និងមនុស្សរងរបួសធ្ងន់ម្នាក់ ស្រាលចំនួន០២នាក់ សរុបស្រី០៣នាក់ ។

ភាគីម្ចាស់រថយន្តឈ្មោះ លោកអនុសេនីយ៍ទោ ហួត ផូតួ នាទីមេបញ្ជាការរងកងរាជអាវុធហត្ថ ស្រុកសាលាក្រៅ អាយុ៤៩ឆ្នាំ រស់នៅភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន​ ។ បើកបររថយន្តម៉ាក HiLux Revo ពណ៌​ ទ្រេអ៊ី ពាក់ផ្លាកលេខខម 09 -2-54 62 (គ្មានរបួស)​ ទិសដៅបើកបរពីជើងទៅត្បូង (ម្ចាស់រថយន្តខាងលើបានបដិសេធថា ខ្លួនពិតជាមិនបានបើកបររថយន្តក្នុងពេលគ្រោះថ្នាក់នោះទេ ហើយដោយបញ្ជាក់ថាឈ្មោះ ពិន ភន មានតួនាទីជាមេបញ្ជាការកងរាជអាវុធហត្ថ ស្រុកសាលាក្រៅ ជាអ្នកបើកបររថយន្ត ក្នុងពេលគ្រោះថ្នាក់។

អ្នកបើកបររថយន្តទី២ឈ្មោះ ងូន ផល្លី ភេទស្រី អាយុ៤៥ឆ្នាំ( រងរបួសធ្ងន់) រស់នៅភូមិដូង ឃុំបឹងរាំង ស្រុកកម្រៀង ខេត្តបាត់ដំបង ។ បើកបររថយន្តម៉ាក lexus Rx 300 ពណ៌ប្រផេះ ពាក់ផ្លាកលេខភ្នំពេញ 2BB 43 27 ផលិតឆ្នាំ២០០៣ បើកបរក្នុងទិសដៅពីត្បូងទៅជើង។

អ្នករួមដំណើរទី១ឈ្មោះ លេង ស្រីពេជ្រ ភេទស្រី អាយុ​៣៤ឆ្នាំ រស់នៅភូមិដូងឃុំ​ បឹងរាំង ស្រុកកម្រៀង ខេត្តបាត់ដំបង ( របួសស្រាល)។ អ្នករួមដំណើរទី២ឈ្មោះ​នី កា ភេទស្រី អាយុ​៣០ឆ្នាំ រស់នៅភូមិ​ អអូរដាលើ ឃុំបឹងរាំង ស្រុកសាលាក្រៅ ខេត្តប៉ៃលិន( របួសស្រាល) ។

មូលហេតុ៖ នៃការគ្រោះថ្នាក់ បណ្តាលមកពី១កត្តាមនុស្ស (ភាគីអ្នកបើកបររថយន្តម៉ាក HiLux Revo ) បើកបរដោយមានសារធាតុស្រវឹងក្នុងខ្លួន និងខ្ជីខ្ជា ខ្វះការប្រុងប្រយ័ត្ន និងបើកបរក្នុងល្បឿនលឿន (មិនសហការជាមួយកម្លាំងជំនាញការិយាល័យ នគរបាលចរាចរណ៍ផ្លូវគោកខេត្ត ដើម្បីពិនិត្យរកសារធាតុគ្រឿងស្រវឹង ) ។

បច្ចុប្បន្នវត្ថុតាងត្រូវបានយកទៅរក្សាទុក នៅអធិការដ្ឋាននគរបាលស្រុកសាលាក្រៅ ដើម្បីរង់ចាំការដោះស្រាយ តាមនីតិវិធី ចំណែកជនរងគ្រោះត្រូវបានបញ្ជូនទៅសង្រ្គោះ នៅមន្ទីរពេទ្យបង្អែក ខេត្តប៉ៃលិន៕

មតិយោបល់