បន្ទាយមានជ័យៈ យោងតាមផេករបស់ ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា ជនសង្ស័យប្រុស-ស្រី ចំនួន០៣នាក់ ត្រូវបានកម្លាំងនគរបាលការិយាល័យជំនាញប្រឆាំងគ្រឿងញៀន ស្នងការដ្ឋាននគរបាលខេត្តបន្ទាយមានជ័យនិងកម្លាំងផ្នែកប្រឆាំងគ្រឿងញៀននៃអធិការដ្ឋាននគ រ បាលក្រុងសិរីសោភ័ណ ដឹកនាំផ្ទាល់ដោយលោកវរសេនីយ៍ឯក ធិន ស៊ិនដេត ស្នងការរង ទទួលផែនការងារប្រឆាំងគ្រឿងញៀន ចុះបង្រ្កាបចាប់ឃាត់ខ្លួនជាបន្តបន្ទាប់ នៅវេលាម៉ោង១១និង១០នាទីព្រឹក ថ្ងៃទី២៦ ខែមករា ឆ្នាំ២០២២ នៅចំណុចជាប់វិទ្យាល័យអូរអំបិល ស្ថិតក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។

លោកវរសេនីយ៍ឯក ធិន ស៊ិនដេត បានឲ្យដឹងថា ៖ បន្ទាប់ពីទទួលបានព័ត៌មានប្រជាពលរដ្ឋរាយការណ៍ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់ចេញនូវបទ បញ្ជាឲ្យលោកដឹកនាំកម្លាំងនគរបាលការិយាល័យជំនាញ ប្រឆាំងគ្រឿងញៀននិងកម្លាំងផ្នែកប្រឆាំងគ្រឿង ញៀន អធិការដ្ឋាននគរបាលក្រុងសិរីសោ ភ័ណ ចុះដល់ទីតាំងនិងឃាត់ខ្លួនជនសង្ស័យប្រុស ស្រី ចំនួន០៣នាក់ ១/-ឈ្មោះ ចាន់ សីហា ហៅកណ្តុរ ភេទប្រុស អាយុ ៣៧ ឆ្នាំ, ២/-ឈ្មោះ ពេជ្រ មុំ ភេទស្រី អា យុ ២៧ឆ្នាំ ទាំង០២នាក់ នៅភូមិអូរអំបិល ក្រុងសិរីសោភ័ណ ខេត្តបន្ទាយមានជ័យ សម្ភារៈដកហូតបានមានម្សៅ ក្រាមពណ៌សថ្លា២២កូនថង់ទម្ងន់៦.៧៦ក្រាម,ថ្នាំប្រភេទគ្រាប់ពណ៌ក្រហម០៦គ្រាប់និង០១ចំហៀង ទម្ងន់០.៥៨ក្រាម,សំបកកូនថង់មួយចំនួន,ដបជក់០១,បំពង់ប៊ឺតវែងខ្លីមួយចំនួន,ដែកកេះ០៨,សំបកទែម៉ូម៉ែត្រ០២។

លោកវរសេនីយ៍ស្នងការរង បានបញ្ជាក់ទៀតថា ៖ ដោយមានការសហការពីឈ្មោះ ចាន់ សីហា និងឈ្មោះ ពេជ្រ មុំ ។ នៅវេលាម៉ោង០៤និង៥០នាទីរសៀលនាថ្ងៃដដែល លោកបានបន្តដឹកនាំ កម្លាំងនគរបាលការិយល័យជំនាញ និងកម្លាំងនគរបាលផ្នែកប្រឆាំងគ្រឿងញៀន អធិការដ្ឋាននគរបាលក្រុងប៉ោយប៉ែត ចុះឃាត់ខ្លួនជនសង្ស័យ ឈ្មោះ ញៀន សុខលាង ហៅនាង ភេទប្រុស អាយុ៤០ឆ្នាំ នៅម្តុំខាងក្រោយកាស៊ីណូហ្រ្គែន ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។

ក្នុងនោះដកហូតបានវត្ថុតាង ៖ ថ្នាំប្រភេទម្សៅក្រាមពណ៌សថ្លាចំនួន០២កូនថង់ ទម្ងន់៣.៨២ក្រាម,និងថ្នាំគ្រាប់ពណ៌ក្រហមចំនួន៨៦គ្រាប់ទម្ងន់៧.៧៤ក្រាម,ទូរស័ព្ទដៃ០១គ្រឿង,ជញ្ជីង០១,ដែកកេះជក់០៨,ដាវ០៣ដើម,កូនកាំបិតខ្លី០២ដើម,សំបកកូនថង់មួយចំនួន។ សរុបវត្ថុតាងទាំង០២ករណី ៖ ម្សៅក្រាមពណ៌សថ្លាចំនួន២៤កូនថង់,ទម្ងន់១០.៥៨ក្រាម,ថ្នាំប្រភេទគ្រាប់ពណ៌ក្រហមចំនួន៩២គ្រាប់និង០១ចំហៀងទម្ងន់៨.៣២ក្រាម,ទូរស័ព្ទដៃ០១គ្រឿង,ដបជក់០៣,បំពង់ប៊ឺតវែងនិងខ្លីមួយចំនួន ដែកកេះ១៤,សំបកទែម៉ូម៉ែត្រ០២,ជញ្ជីង០១,ដាវ០៣ដើម,កូនកាំបិតខ្លី០២ដើម,សំបកថង់មួយចំនួន ។

លោកវរសេនីយ៍ឯក ធិន ស៊ិនដេត បានបញ្ជាក់ទៀតថា ៖ ជនសង្ស័យទាំង០៣នាក់និងវត្ថុតាង ត្រូវបានកម្លាំងនគរបាលជំនាញបញ្ជូនខ្លួនទៅសាលាដំបូងខេត្តបន្ទាយមានជ័យ នៅរសៀលថ្ងៃទី២៧ ខែមករា ឆ្នាំ២០២២ ដើម្បីចាត់ការតាមនិតិវិធីហើយដែរ៕