បន្ទាយមានជ័យ: យោងតាមផេកផ្សព្វផ្សាយអប់រំ ក្រសួងមហាផ្ទៃបានឲ្យដឹងថា នៅថ្ងៃអាទិត្យ ៩ រោច ខែស្រាពណ៍ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២១ ខែសីហា ឆ្នាំ២០២២ កម្លាំងនគរបាលជំនាញការិយាល័យព្រហ្មទណ្ឌកម្រិតធ្ងន់ របស់ស្នងការដ្ឋាននគរបាលខេត្តបន្ទាយមានជ័យ បានបញ្ជូនខ្លួនជនសង្ស័យចំនួន ០៥នាក់ ក្នុងនោះស្រី០១នាក់ ទៅសាលាដំបូងខេត្តបន្ទាយមានជ័យ ក្រោយពីឃាត់ខ្លួននៅថ្ងៃទី១៨ ខែសីហា ឆ្នាំ២០២២ នៅចំណុចផ្ទះសំណាក់ ហេង គង់ ស្ថិតក្នុង ភូមិជំទាវ ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ ។

លោកវរសេនីយ៍ឯក ភឿង ម៉ាន់សឹង្ហ នាយការិយាល័យ នគរបាលព្រហ្មទណ្ឌកម្រិតធ្ងន់ ប្រាប់ថា៖ ក្រោមការដឹកនាំបញ្ជាផ្ទាល់ពី លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងអនុវត្ត តាមអំណាចដីកាបង្គាប់ឲ្យចាប់ខ្លួន លេខ៣៦ ចុះថ្ងៃទី២៧ ខែកុម្ភ: ឆ្នាំ២០១៤ របស់លោក អ៊ិត សម្ភស្ស ចៅក្រមជំនុំជម្រះនៃសាលាដំបូងខេត្តបន្ទាយមានជ័យ និង តាមបញ្ជារបស់ឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ តាមទូរស័ព្ឌថ្ងៃទី១៨ ខែសីហា ឆ្នាំ២០២២។ កម្លាំងនគរបាលជំនាញការិយាល័យព្រហ្មទណ្ឌកម្រិតធ្ងន់បានឃាត់ខ្លួនជនសង្ស័យ០១នាក់៖ ១-ឈ្មោះ ឡាំ សុថេត ហៅ ឡាំ ឡុច ភេទប្រុស អាយុ ២៧ឆ្នាំ (មានដីកាចាប់ខ្លួន ពីបទហិង្សាដោយចេតនាមានស្ថានទម្ងន់ទោស និងជាមុខសញ្ញាធ្លាប់ប្រើប្រាស់អាវុធខុសច្បាប់ធ្វើសកម្មភាពស្ទាក់បាញ់កង់រថយន្តដឹកពិរុទ្ធជន របស់មន្ទីរពន្ធនាគារខេត្ត គោលបំណងរំដោះអ្នកទោស កាលពីថ្ងៃទី២៤ ខែធ្នូ ឆ្នាំ២០២១ ខណ:រថយន្តនោះដឹកពិរុទ្ធជនត្រឡប់មកពីសម្រាកព្យាបាលនៅមន្ទីរពេទ្យបង្អែកមិត្តភាពកម្ពុជា ជប៉ុន នៅស្រុកមង្គលបូរី និងដកហូតអាវុធខ្លី០១ដើម បង់០១ គ្រាប់០៤គ្រាប់ ។​ ឈ្មោះ ឡាំ សុថេត ហៅ ឡាំ ឡុច ក៏ជាមុខសញ្ញាធ្លាប់ជាប់ពន្ធនាគារនៅត្រពាំងថ្លុង ខេត្តត្បូងឃ្មុំ ពាក់ព័ន្ធករណីគ្រឿងញៀននិងប្រើអំពើហិង្សា និងបានចេញពីពន្ធនាគារកាលពីថ្ងៃទី២០ ខែកុម្ភ: ឆ្នាំ២០២១ ។

លោកនាយការិយាល័យ នគរបាលព្រហ្មទណ្ឌកម្រិតធ្ងន់បានបញ្ជាក់ថា៖ ក្រោយពីឃាត់ខ្លួន ឈ្មោះ ឡាំ សុថេត ហៅ ឡាំ ឡុច ។ កម្លាំងជំនាញបានឃាត់ខ្លួនជនសង្ស័យពាក់ព័ន្ធ ប្រុស ស្រីចំនួន០៤នាក់បន្ថែមទៀតមាន៖ ១-ឈ្មោះ ប៉ក់ ជាលី ហៅជាវ អាយុ ៣២ឆ្នាំ មានទីលំនៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដែលផ្តល់អាវុធខ្លីឲ្យឈ្មោះ ឡាំ សុថេត ហៅ ឡាំ ឡុច ប្រើប្រាស់ ។ ២-ឈ្មោះ នួន វីរ: ភេទប្រុស អាយុ ១៧ឆ្នាំ នៅភូមិថ្មី សង្កាត់ផ្សាកណ្តាល ក្រុងប៉ោយប៉ែត។ ៣-ឈ្មោះ តាំង ស្រីវី ភេទស្រី អាយុ ១៧ឆ្នាំ ភូមិថ្មី សង្កាត់ផ្សាកណ្តាល ក្រុងប៉ោយប៉ែត។ ៤-ឈ្មោះ ស៊ិន សុហេង ភេទប្រុស អាយុ ២៧ឆ្នាំ នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ។

លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានបញ្ជាក់ថា៖​ ក្រោយពីឃាត់ខ្លួន ឈ្មោះ ឡាំ សុថេត ហៅ ឡាំ ឡុច បានសារភាពថា៖ ពេលខ្លួនចេញពីពន្ធនាគារអត់ការងារធ្វើ ឈ្មោះ ប៉ក់ ជាលី ហៅជៀវ បានហៅរូបគេឲ្យធ្វើការចែកចាយថ្នាំញៀននិងឲ្យអាវុធខ្លី០១ដើមមិនស្គាល់ម៉ាកមកឲ្យគេប្រើប្រាស់ដើម្បីការពារខ្លួន ពេលដែលធ្វើការចែកចាយថ្នាំញៀនដូចជាយកថ្នាំញៀនទៅប្លុងទុកតាមគល់ឈើឬបង្គោលភ្លើងហើយឈ្មោះ ប៉ក់ ជាលី ហៅជៀវ ជាអ្នកហៅឲ្យម៉ូយទៅយក ហើយខ្លួនបានធ្វើការចែកចាយថ្នាំញៀនឲ្យឈ្មោះ ប៉ក់ ជាលី ហៅជៀវ រយ:ពេល០៥ទៅ០៦ខែមកហើយ ។ ចំណែកឈ្មោះ ប៉ក់ ជាលី ហៅជៀវ សង្ស័យជាអ្នកផ្តល់អាវុធខ្លីនិងថ្នាំញៀនឲ្យឈ្មោះឡាំ សុថេត ហៅ ឡាំ ឡុច ជាអ្នកដើរចែកចាយ ដោយផ្អែកលើវីដេអូក្លីបចំនួន០៣ក្លីប តែជននេះ បានបដិសេដមិនព្រមសារភាព ។ តែទោះយ៉ាងណាឈ្មោះ ឡាំ សុថេត ហៅ ឡាំ ឡុច និងឈ្មោះ ប៉ក់ ជាលី ហៅជៀវ រួមទាំងវត្ថុតាងអាវុធខ្លី ០១ ដើម គ្រាប់០៤ បង់០១ និងអ្នកពាក់ព័ន្ធ០៣នាក់ ទៀត កម្លាំងនគរបាលជំនាញព្រហ្មទណ្ឌកម្រិតធ្ងន់ បានរៀបចំសំណុំរឿងបញ្ជូនខ្លួនទៅសាលាដំបូងខេត្ត ចាត់ការតាមនិតិវិធីហើយដែរ៕