នៅចុងឆ្នាំ ២០១១ នេះ ចាន់ ស្រីរ័ត្ន ដែលជាអ្នកសម្តែង និង បង្ហាញម៉ូដត្រូវ បានគេចាប់អារម្មណ៍ និង មើល ឃើញថាកំពុងតែមានហាងឆេងព្រោះនាងបាន ទទួលថត និង សម្តែងរឿងវីដេអូភាគ សម្រាប់ បញ្ចាំងលើកញ្ចក់ ទូរទស្សន៍នានាដល់ទៅបីរឿងក្នុងពេលតែមួយដោយបានធ្វើជាតួឯកទៀតផង ។
ថ្វីបើទើបចូលប្រឡូកក្នុងពិភពសិល្បៈសម្តែងបានប្រមាណប្រាំឆ្នាំ តែនាងត្រូវបានបណ្តាផលិតកម្ម មួយចំនួន មានការចាប់អារម្មណ៍ពេញចិត្តលើរូបសម្ផស្ស និង ទេពកោសល្យសម្តែងរបស់នាងជាខ្លាំង ដោយគេបានទាក់ទង អញ្ជើញនាងឱ្យចូលរួមថតសម្តែងរឿងវីដេអូឱ្យគេជាបន្តបន្ទាប់ ពិសេសនាងត្រូវបានឱ្យសម្តែង ជាតួឯកក្នុងរឿង ទៀតផង ។
ចាន់ ស្រីរ័ត្ន បាននិយាយរៀបរាប់ប្រាប់ឱ្យដឹងថា ឈានចូលដល់ចុងឆ្នាំ ២០១១ នេះ នាងមានការងារមមាញឹក ជាខ្លាំងក្នុងនោះសំខាន់គឺការថតសម្តែងរឿងវីដេអូភាគ ដល់ទៅបីរឿងសម្រាប់ដាក់បញ្ចាំងលើកញ្ចក់ ទូរទស្សន៍នា ពេលខាងមុខ ។ ព្រោះតែហេតុនេះទើបនាងត្រូវបែងចែកពេលវេលាទៅថតសម្តែងឱ្យផលិតកម្មនីមួយៗ មិនឱ្យខកខានហើយក៏មិនចោលការសិក្សារបស់នាងនៅសាកលវិទ្យាល័យ ជាតិគ្រប់គ្រងដែរ ។
បើទោះជារវល់ខ្លាំងក្នុងការសម្តែងយ៉ាងណាក៏ដោយ ក៏នាពេលដំណាច់ ឆ្នាំសកល ២០១១ ខាងមុខនេះ ចាន់ ស្រីរ័ត្ន ក៏នៅតែឆ្លៀតទៅចូលរួមក្នុងពិធី បង្ហាញម៉ូដដែលនឹងប្រព្រឹត្តទៅនាឆ្នេរសមុទ្រអូរឈើទាលទឹកដីនៃខេត្តព្រះសីហនុ ក្នុង ពិធីបុណ្យសមុទ្រដ៏ធំ និង ជាលើកទីមួយនៅកម្ពុជាដែរ ។
នៅពេលដែលកញ្ញា ចាន់ ស្រីរ័ត្ន កាន់តែមានហាងឆេងក្នុងពិភពសិល្បៈ ក៏មានអ្នកខ្លះបង្ហាញនូវក្តីងឿងឆ្ងល់ ថាតើនាងមានលក្ខណៈពិសេសអ្វីខ្លះទៅ ទើបបណ្តាផលិតកម្មមួយចំនួនចាប់អារម្មណ៍ហៅនាងឱ្យទៅថតរឿងស្របពេលដែលអ្នកសម្តែងខ្លះមិនមានគេហៅទៅថត ?
ថ្វីបើកញ្ញា ចាន់ ស្រីរ័ត្ន ជាតួសម្តែងថ្មី ទើប ចូលប្រឡូកក្នុងការងារថតសម្តែងបានរយៈប្រាំឆ្នាំ តែនាងក៏បាន សម្តែងជាតួរងនៅក្នុងរឿងមួយចំនួនមានដូចជារឿង “ល្បិចស្រី”, រឿង “ម្ចាស់ បេះដូង”, រឿង “រាជិនីដួងចិត្ត”, រឿង “ក្រោម មេឃបើគ្មានអូន”, រឿង “បេសកកម្មតន្ត្រី”, រឿង “គូព្រេងចម្លែក”, រឿង “បណ្តាសាថើប”…ជាដើម ។
ពេលនេះ ចាន់ ស្រីរ័ត្ន ក្រៅតែពីជាអ្នកសម្តែងដែលកំពុងទទួលបាននូវការចាប់អារម្មណ៍ពីទស្សនិកជននាង ក៏ជាអ្នកដើរបង្ហាញម៉ូដមួយរូបនៅក្នុងក្រុម Cambodia Super Model និង ធ្លាប់ថត ចម្រៀងកាយវិការ ថតស្ប៉ត ផ្សាយពាណិជ្ជកម្មខ្លីជាច្រើនមានដូចជាស្ប៉តគូស្នេហ៍ អាពាហ៍ពិពាហ៍ ស្រាបៀរអាន់ឆ័រកាលពីឆ្នាំ ២០០៩, ថត ស្ប៉តម្សៅលាបមុខប៉ុបពី, ថតស្ប៉ត ស្រាបៀរ ភ្នំពេញ, ថត ស្ប៉តស្តីពីការថែរក្សាបរិស្ថាន ដែលនាងធ្វើជាគ្រូរបស់នាយក្រិន, ថតស្ប៉ត ឱ្យ ឃ្យូប, ថតឱ្យ ANZ ថតឱ្យ Hello ថតឱ្យ Beeline ថតឱ្យម៉ូតូហុងដាឆ្នាំ ២០១១…ជាដើម ៕
មតិយោបល់