បន្ទាប់ពីមានសន្ទុះឡើងវិញបន្តិចនៅក្នុងប្រទេសហ្វាំងឡង់ នៅពេលនេះ មានការស្រាវជ្រាវថ្មីបានរកឃើញថា ទីផ្សារ Windows Phone បានកើនឡើងនៅក្នុងតំបន់អឺរ៉ុប។
យោងតាមការស្រាវជ្រាវរបស់ Kantar Worldpanel ComTech បានឲ្យដឹងថា នៅក្នុងតំបន់អឺរ៉ុប ទីផ្សាររបស់ Windows Phone បានងើបឡើង គួរឲ្យគត់សម្គាល់ ជាពិសេសគឺប្រទេសអ៊ីតាលី និងចក្រភពអង់គ្លេស។
របាយការណ៍របស់ក្រុមស្រាវជ្រាវខាងលើបានបង្ហាញឲ្យដឹងថា នៅក្នុងប្រទេសអ៊ីតាលី ទីផ្សារ Windows Phone ដែលជារបស់ Microsoft មួយនេះ បានកើនឡើង ១៣,៩% នៅក្នុងឆ្នាំ ២០១២ បើធៀបនឹងឆ្នាំ ២០១១ កើនឡើង ២,៨% ចំណែកនៅក្នុងចក្រភពអង់គ្លេសវិញ បានកើនឡើង ៥,៩% បើធៀបនឹងឆ្នាំ ២០១១ កើនឡើង ២,២%។
នៅក្នុងឆ្នាំ ២០១២ កន្លងទៅ ទីផ្សាររបស់ Windows Phone បានមានសន្ទុះឡើងវិញគ្រប់តំបន់ ដោយនៅបារាំង និងអេស្ប៉ាញ បានកើនឡើងពី ៣,៧% ទៅ ៤,១% និងពី ០,៤% ទៅ ១,៨% ដោយឡែកនៅអាល្លឺម៉ង់វិញ បានធ្លាក់ចុះពី ៣,០% មកនៅត្រឹម ២,៦%។
ទីផ្សារ Windows Phone បានងើបឡើងវិញនេះ ក៏ដោយសារតែក្រុមហ៊ុនទូរស័ព្ទដៃហ្វាំងឡង់ Nokia ដោយ Nokia និង Microsoft បានសហការគ្នាយ៉ាងល្អលើស្មាតហ្វូនត្រកូល Lumia។
ក្រុមអ្នកវិភាគខាងលើបានលើកឡើងថា ទីផ្សារ Windows Phone នឹងកើនឡើងខ្ពស់នៅឆ្នាំបន្ទាប់ ប៉ុន្តែមិនមែនឆ្នាំ ២០១៣ នេះទេ៕
មតិយោបល់