វ៉ាស៊ិនតោន ( 01/08/13 ) : សេតវិមានបានចេញមកបញ្ជាក់ពីអារម្មណ៍នៃការអន់ចិត្តខ្លាំងជាមួយនឹងរុស្ស៊ីកាលពីថ្ងៃម្សិលមិញក្រោយប្រទេសរុស្ស៊ីបានអនុញ្ញាតិឲ្យ Snowden ដែលអាមេរិកបានព្យាយាមយ៉ាងខ្លាំងក្នុងការតាមចាប់ខ្លួនបញ្ជូនខ្លួនមកកាន់អាមេរិកវិញទទួលបានសិទិ្ធជ្រកកោនរយពេលមួយឆ្នាំ។
អ្នកនាំពាក្យរបស់សេតវិមានលោក Jay Carney បានមានប្រសាសថាពួកយើងពិតជាខកចិត្តជាខ្លាំងដែលរុស្ស៊ីបានជ្រើសរើសយកជម្រើសមួយនេះទៅវិញជំនួសនឹងការខិតខំរបស់អាមេរិកតាមវិធីស្របច្បាប់កន្លងមកនេះ។ឧក្រិដ្ឋជនដែលបានទម្លាយរឿងសម្ងាត់ជាច្រើនទាក់ទងនឹងទីភ្នាក់ងារសន្តិសុខជាតិអាមេរិកទៅកាន់ពិភពលោកបានស្នាក់នៅបណ្តោះអាសន្ននៅក្នុងព្រលានយន្តហោះទីក្រុងមូស្គូតាំងពីថ្ងៃទី 23 មិថុនា ទើបតែទទួលបាននូវសិទ្ធិជ្រកកោនមួយឆ្នាំពីរុស្ស៊ីហើយខ្លួនត្រូវបានជន្លៀសខ្លួនទៅកាន់កន្លែងសុវត្ថិភាពមួយផ្សេងទៀតផងដែរកាលពីព្រឹកថ្ងៃព្រហស្បតិ៍នេះ។
ការបដិសេធតាមសំណើររបស់អាមេរិកក្នុងធ្វើបត្យាប័ណ Snowden ទៅវិញនេះជាការធ្វើឲ្យមានការរង្គោះរង្គើយ៉ាងខ្លាំងរវាងចំណងមិត្តភាពរបស់ប្រទេសទាំងពីរនៅខណៈដែលសេតវិមានក៏បានបដិសេធភ្លាមៗលើជំនួបគ្នារវាងលោកប្រធានាធិបតីបារ៉ាក់អូបាម៉ានិងលោកពូទីនក្នុងឱកាសនៃកិច្ចប្រជុំ G20 ដែលនឹងប្រារព្ធឡើងនៅខែកញ្ញាខាងមុខនេះនៅក្នុងប្រទេសរុស្ស៊ី៕
មតិយោបល់