ប្រិយមិត្តរបស់ក្រុមហ៊ុន Apple កំពុងតែទន្ធឹងរង់ចាំថា តើមានអ្វីសម្រាប់ iPhone ជំនាន់ទី៧? មុខងារស្គែនម្រាមដៃ កាមេរ៉ា ១២មេហ្គាភិចសែល ពណ៌មាន ។ល។
ព័ត៌មានថ្មីចុងក្រោយបានចុះផ្សាយថា ក្រុមហ៊ុន Apple នឹងធ្វើការបង្ហាញ iPhone ជំនាន់ទី៧នៅថ្ងៃទី១០ខែកញ្ញា ឆ្នាំ ២០១៣ ប៉ុន្តែព័ត៌មាននេះនៅមិនទាន់ជាក់លាក់នោះទេ ព្រោះថាវាគ្រាន់តែជាព័ត៌មានចចាមអារ៉ាម។ ចំណុចមួយដែលអាចជឿជាក់បានគឺ iPhone ជំនាន់ថ្មីវានឹងល្អប្រសើរជាង iPhone 5 នាពេលបច្ចុប្បន្ន។ សម្រាប់លោកអ្នកដែលជាប្រិយមិត្ត Apple អាចសន្សំលុយ ដើម្បីរង់ចាំទិញជំនាន់ថ្មី ព្រោះថាវានឹងមកដល់ឆាប់ៗ។
នៅថ្ងៃនេះ ដំណឹង សូមលើកយកនូវព័ត៌មានចចាមអារ៉ាមធំៗចំនួន ៧ដែលពាក់ព័ន្ធនឹង iPhone ជំនាន់ទី៧៖
១. មុខងារស្គែនម្រាមដៃ
ប្រភពព័ត៌មានជាច្រើនបានចុះផ្សាយថា ក្រុមហ៊ុន Apple បានបន្ថែមនូវលក្ខណៈពិសេសមួយទៀតដើម្បីជាប្រព័ន្ធការពារនោះគឺមុខងារស្គែនម្រាមដៃ។ ប្រភពព័ត៌មានបានបញ្ជាក់ថា មុខងារស្គែនម្រាមដៃត្រូវបានបំពាក់ជាមួយនឹងប៊ូតុង Home ដែលអាចប្រើសម្រាប់ចាកសោរ និងដោះសោរ។
២. ប្រើប្រាស់ A7 Chip និងមាន RAM ទំហំ 1GB
សារព័ត៌មានមួយចំនួនបានរំពឹងទុកថា ក្រុមហ៊ុន Apple នឹងប្រើប្រាស់ A7 Chip សម្រាប់ iPhone ជំនាន់ទី៧ ដោយមាន Upgrade ពី A6 នៅលើ iPhone 5។ ពាក់ព័ន្ធនឹងគ្នានេះផងដែរ Apple ក៏បានបន្ថែមទំហំ RAM រហូតដល់ 1GB។
៣. កាមេរ៉ាទំហំ ១២មេហ្គាភិចសែល និង Dual LED flash
ដើម្បីឲ្យការប្រើប្រាស់កាន់តែប្រសើរឡើង ក្រុមហ៊ុន Apple បានបំពាក់កាមេរ៉ាទំហំ ១២មេហ្គាភិចសែល មកលើ iPhone ជំនាន់ថ្មី រួមនឹងភ្លើង dual LED flash ដែលពាក្យចចាមអារ៉ាមមួយចំនួនបាននិយាយថា ក្រុមហ៊ុន Apple ពិតមាន Upgrade ទំហំកាមេរ៉ា។
៤. iPhone 5S ពណ៌មាស
ពណ៌ស និងខ្មៅជាសំណប់ចិត្តរបស់ក្រុមហ៊ុន Apple ព្រោះថា ស្ទើរតែ ៨០ភាគរយនៃផលិតផលរបស់ Apple គឺប្រើប្រាស់តែពណ៌ស និងខ្មៅ ជាពិសេសគឺ iPhone តែម្ដង ប៉ុន្តែប៉ុន្មានថ្ងៃនេះ មានព័ត៌មានបែកធ្លាយរូបភាព iPhone ពណ៌មាស ដែលធ្វើឲ្យមហាជន និងអ្នកគាំទ្រមានការភ្ញាក់ផ្អើលយ៉ាងខ្លាំង។
៥. iPhone 5S ម៉ូដែល 128GB
iPhone ដែលក្រុមហ៊ុន Apple ផលិតផលនាពេលបច្ចុប្បន្នគឺមាន iPhone 16GB, 32GB និង 64GB ប៉ុន្តែ សម្រាប់ពេលនេះ មានព័ត៌មានចចាមអារ៉ាមមួយបាននិយាយថា ក្រុមហ៊ុន Apple នឹងចេញ iPhone 5S 128 GB។ តើអស្ចារ្យទេ សម្រាប់ iPhone ជំនាន់ទី៧?
៦. បច្ចេកវិទ្យា Near-field communication (NFC)
ជាបច្ចេកវិទ្យាថ្មីមួយសម្រាប់ស្មាតហ្វូន ដែលត្រូវបានគេរំពឹងទុកថា ក្រុមហ៊ុននឹងបំពាក់វាមកលើ iPhone 5S ព្រោះថាបច្ចេកវិទ្យានេះ Apple មិនធ្លាប់បានប្រើនៅលើ iPhone មុនៗឡើយ។
៧.តម្លៃ
ពាក់ព័ន្ធនឹងរឿងតម្លៃ ក៏មានពាក្យចចាមអារ៉ាមជាច្រើនបាននិយាយថា iPhone ជំនាន់ទី៧អាចនឹងថោកជាងមុនបន្តិច ប៉ុន្តែមិនប្រាកដថាប៉ុន្មាននោះទេ។
គួរបញ្ជាក់ផងដែរថា នេះគឺព័ត៌មានមួយចំនួនដែលទាក់ទងនឹង iPhone ជំនាន់ទី៧ ដេលនឹងបង្ហាញខ្លួននៅខែក្រោយ ហើយលេខ៧ ប្រហែលជាលេខហ៊ុងសុយសម្រាប់ Apple ផងដែរ ព្រោះថានៅក្នុងនោះមាន iOS 7 លក្ខណៈពិសេស ៧យ៉ាង និងជា iPhone ជំនាន់ទី៧។
គួរបញ្ជាក់ផងដែរថា នៅថ្ងៃទី១០ខែកញ្ញា ស្អែកនេះ ក្រុមហ៊ុន Apple នឹងបង្ហា្ញញ iPhone ជំនាន់ថ្មី ដែលត្រូវបានគេរំពឹងទុកថា iPhone 5S។ ប្រិយមិត្ត្អាចចុច Like ដំណឹង Page នៅលើ Facebook ដើម្បីទទួលបានព័ត៌មានពី iPhone ថ្មី។ ស្អែកនេះ យើងនឹងផ្សាយអំពី ព្រឹត្តិការបង្ហាញ iPhone 5S។ កុំភ្លេចតាមដានទាំងអស់គ្នា៕
មតិយោបល់