ស្ត្រីខ្លះចូលដំណេកយឺត ប៉ុន្តែមិនហ៊ានដេកយូររហូតដល់ម៉ោង ៧ ឬ ៨ ឡើយព្រោះខ្លាចគេថាជាស្ត្រីខ្ជិល ឬស្ត្រីដេកទ្រមក់ជាដើម តែពេលនេះសុភាពនារីទាំងឡាយអាចដណ្ដប់ភួយដេកយូរ ហើយអាចលើកហេតុផលដ៏ល្អមួយមកពន្យល់។ ការសិក្សាថ្មីបំផុតមួយបានរកឃើញថា ការទទួលទានដំណេកមិនគ្រប់គ្រាន់ធ្វើឲ្យស្ត្រីប្រឈមនឹងគ្រោះថ្នាក់ខ្ពស់ ប៉ុន្តែចំណែកបុរសវិញមិនសូវជាមានបញ្ហាធ្ងន់ធ្ងរនោះទេ។
លទ្ធផលនៃការស្រាវជ្រាវបង្ហាញថា ស្ត្រីដែលដេកតិចជាង៨ម៉ោងនៅពេលយប់ អាចប្រឈមមុខខ្ពស់នៅក្នុងការកកើតរោគបេះដូង។
មីសែល មីល័រ (Michelle Miller) សាស្ត្រាចារ្យខាងផ្នែកវេជ្ជសាស្ត្រគីមី នៅសាលាពេទ្យនៃ សាកលវិទ្យាល័យវ៉ាវ៉ីក (Warwick) ដែលជាអ្នកធ្វើការស្រាវជ្រាវនេះបាននិយាយថា មនុស្សគ្រប់រូបគួរតែព្យាយាមដេកពី ៧ ទៅ ៨ម៉ោង ហើយចំពោះស្ត្រី ជាពិសេសត្រូវតែដេកឲ្យបានត្រឹមចំនួនខាងលើនោះ។ សាស្ត្រាចារ្យ មីល័រ បាននិយាយថា «លទ្ធផលនេះដូចគ្នាជាមួយនឹងការរកឃើញនៃការស្រាវជ្រាវមុនៗដែលអះអាងថា ការដេកមិនគ្រប់គ្រាន់មានការពាក់ព័ន្ធធ្វើឲ្យកើតរោគបេះដូង ប៉ុន្តែការសិក្សាយើងនេះផ្ដោតការយកចិត្តទុកដាក់ចំពោះផលប៉ះពាល់លើស្ត្រី និងភាពខុសគ្នានៃផលប៉ះពាល់រវាងបុរស និងស្ត្រី»។
ការស្រាវជ្រាវនេះធ្វើឡើងរួមគ្នារវាងសាកលវិទ្យាល័យវ៉ាវ៉ីក និងសាកលវិទ្យាល័យឡុងដុង (college London)។ គេបានរកឃើញថា មានកម្រិតនៃសារជាតិចំនួនពីរដែលនាំឲ្យមានបញ្ហា បេះដូងមានលក្ខណៈខុសគ្នាច្រើនគួរឲ្យកត់សម្គាល់ ទៅតាមរយៈពេលនៃដំណេករបស់ស្ត្រី ប៉ុន្តែកម្រិតនៃសារជាតិទាំងពីរនោះមិនប្រែប្រួលខ្លាំងលើខ្លួនបុរសនោះទេ។
កម្រិតនៃសារជាតិ Interleukin-6 ដែលពាក់ព័ន្ធបង្កឲ្យកើតមានជំងឺបេះដូងមានការធ្លាក់ចុះយ៉ាងច្រើនចំពោះស្ត្រីដែលបាន ៨ម៉ោង ប៉ុន្តែចំពោះស្ត្រីដែលដេកបាន ៧ ម៉ោងមិនសូវធ្លាក់ចុះទេ។ ចំណែកកម្រិត hs-CRP ដែលជាសារជាតិមួយអាចបង្ហាញពីភាពគ្រោះថ្នាក់នៃរោគបេះដូងនាពេលអនាគតនោះ កើនឡើងខ្ពស់មែនទែនចំពោះស្ត្រីដែលដេកបានត្រឹមតែ ៥ម៉ោង ឬ តិចជាង៥ម៉ោង។
ទៅបីជាយ៉ាងណាក៏ដោយ ចំពោះបុរសវិញភាពខុសគ្នានៃកម្រិតទាំងពីរនោះមិនសូវជាមានការប្រែប្រួលនោះទេ បើទោះជាចំនួននៃការដេកខុសគ្នាក៏ដោយ។
សាស្ត្រាចារ្យ មីល័រ និយាយថា ការសិក្សាបន្ថែមនឹងត្រូវគេធ្វើជាបន្តទៀតដើម្បីឲ្យដឹងពីភាពខុសគ្នារវាងស្ត្រី និងបុរសនេះ ប៉ុន្តែគាត់បានសន្និដ្ឋានជំហានដំបូងថា ភាពខុសគ្នានោះអាចបណ្ដាលឲ្យកម្រិតអ័រម៉ូនបុរស និងស្ត្រីមិនដូចគ្នា។
ការស្រាវជ្រាវដែលគេបានបោះពុម្ពផ្សាយនៅលើព្រឹត្តិបត្រព័ត៌មាន American Journal Sleep នោះមានការចូលរួមពីមន្ត្រីរាជការចំនួនជាង ៤,៦០០នាក់ នៅក្នុងទីក្រុងឡុងដុង ដែលមានអាយុចាប់ពី៣៥ឆ្នាំ ដល់៥៥ឆ្នាំហើយនៅក្នុងចំណោមនោះប្រហែលជា៧៣ភាគរយគឺជាបុរស។ អ្នកចូលរួមទាំងអស់ ត្រូវបានគេសាកសួរអំពីរយៈពេលនៃការដេករបស់ពួកគេ ហើយបន្ទាប់មកគេបានពិនិត្យសុខភាព ដោយក្នុងនោះរួមមានទាំងការធ្វើតេស្តឈាមផងដែរ។
អ្នកស្រី ជូន ដាវីសាន់ (June Davison) គិលានុបដ្ឋាយិកាផ្នែកជំងឺបេះដូង ធ្វើការនៅ British Heart Foundation បាននិយាយថា «ការសិក្សារនេះរកឃើញថា ស្ត្រីដែលដេកតិចភាគច្រើនកើតមានរោគសញ្ញានៃការរលាក។ ចំពោះបុរសវិញគឺគ្មានរោគសញ្ញានោះទេ»។ គេជឿថា ការរលាកនៅក្នុងរាងកាយរបស់យើងនោះគឺបណ្ដាលមកពីរោគបេះដូង។
ការសិក្សាមុនៗបានអះអាងថា ការដេកលក់ស្រួលនៅពេលយប់ ប្រហែលជាអាចធ្វើឲ្យបេះដូងរបស់យើងមានសុខភាពល្អ ហើយលំហូរឈាមមានលក្ខណៈល្អប្រសើរ ហើយការសិក្សានេះកាន់តែចង្អុលបង្ហាញយ៉ាងច្បាស់ថា ការដេកបានគ្រប់គ្រាន់មានប្រយោជន៍ចំពោះបេះដូង ពិសេសគឺសម្រាប់ស្ត្រីតែម្ដង៕
មតិយោបល់