បន្ទាប់ពីបានទិញយកក្រុមហ៊ុន Palm និងបានសម្លាប់ប្រព័ន្ធដំណើរការ webOS មក ក្រុមហ៊ុន HP បានបោះបង់ទីផ្សារស្មាតហ្វូនចោល ទាំងដែល Apple និង Samsung មិនទាន់ល្បីឈ្មោះខ្លាំងនៅលើទីផ្សារ។ ដោយឡែកនៅពេលនេះ ក្រុមហ៊ុនដែលបោះបង់ទីផ្សារស្មាតហ្វូនចោលមួយនេះ មានគម្រោងចង់វិលត្រឡប់មកចូលក្នុងសមរភូមិនេះម្ដងទៀត ជាមួយនឹងស្មាតហ្វូនថ្មី បច្ចេកវិទ្យាថ្មី។
យោងតាមសារព័ត៌មាន The Information បានឲ្យដឹងថា ក្រុមហ៊ុន HP ចង់បង្ហាញ Phablet (ជាកូនកាត់រវាងស្មាតហ្វូន និង Tablet) អេក្រង់ ៦អ៊ីង និង ៧អ៊ីង ឲ្យបានមុនឆ្លងឆ្នាំថ្មី ពោលគឺនៅចុងឆ្នាំនេះតែម្ដង។ គេនៅមិនទាន់ដឹងថាវាមានឈ្មោះអ្វីនោះទេ ប៉ុន្តែដឹងថានឹងមាននៅលក់នៅលើទីផ្សារមួយចំនួនដូចជា ចិន ហ្វីលីពីន និងឥណ្ឌា ប៉ុន្តែទីផ្សារធំប្រហែលជាចិន។
បើទោះបីជាព័ត៌មានចចាមអារ៉ាមមួយនេះហាក់ដូចជាការពិតក្ដី ប៉ុន្តែយើងកុំភ្លេចថា អ្នកស្រី Meg Whitman នាយកប្រតិបត្តិ HP បាននិយាយថា HP នឹងមិនបង្ហាញស្មាតហ្វូននៅក្នុងឆ្នាំ ២០១៣ នោះទេ។
តើ HP អាចប្រកួតប្រជែងជាមួយនឹងបណ្ដាក្រុមហ៊ុនផ្សេងបានទេ ខណៈពេលដែលក្រុមហ៊ុនទូរស័ព្ទជាច្រើនកំពុង់ឆ្ពោះទៅរកភាពជោគជ័យ?
មតិយោបល់