ទីក្រុង Rio De Janeiro៖មន្ត្រីរបស់រដ្ឋបានរាយការណ៍កាលពីថ្ងៃពុធម្សិលមិញថាចំនួនមនុស្សស្លាប់កើនដល់ 18 នៅក្នុងគ្រោះមហន្តរាយធម្មជាតិមួយនៅក្នុងប្រទេសប្រេស៊ីលនៅតំបន់ភាគខាងត្បូងឈៀងខាងកើតនៃរដ្ឋ Espiritu Santo ។
ចំនួនប្រជាពលរដ្ឋដែលត្រូវជន្លៀសចេញពីតំបន់គ្រោះថ្នាក់ដោយសារភ្លៀងធ្លាក់ខ្លាំងនោះមានទៅដល់ 48,000 នាក់នៅពេលដែលអជ្ញាធរបានបញ្ជាក់ថាចំនួនស្លាប់អាចនឹងកើនឡើងបន្តទៀតដោយសារមនុស្សបាត់ខ្លួនក៏នៅមានចំនួនច្រើនផងដែរនោះ។
ដោយសារតែភ្លៀងធ្លាក់ខ្លាំងនិងជោគជាំតាំងតែពីសប្តាហ៍មុនមកនោះបានធ្វើឲ្យផ្លូវជាច្រើនខ្សែត្រូវបានកាត់ផ្តាច់អគ្គិសនីនិងទឹកស្អាតសម្រាប់ប្រើប្រាស់ក៏ខ្វះខាតទៀតហើយទីក្រុង 50 នៅក្នុងចំណោមទីក្រុង 78 របស់រដ្ឋមួយនេះត្រូវបានដាក់ប្រកាសក្នុងភាពអាសន្ន។
នៅក្នុងទស្សនៈកិច្ចចុះសួរសុខទុក្ខនិងត្រួតពិនិត្យតំបន់រងគ្រោះលោកស្រីប្រធានាធិបតីប្រេស៊ីល Dilma Rousseff បានបញ្ជាក់ថាលោកស្រីមិនធ្លាប់បានឃើញទឹកភ្លៀងដ៏ច្រើនយ៉ាងនេះទេហើយអ្វីដែលរដ្ឋគួរធ្វើជាចម្បងសម្រាប់ជំហានបន្ទាប់គីការជួយសង្គ្រោះនិងការពារមិនឲ្យមានចំនួននៃអ្នកស្លាប់កើនឡើងនោះឡើយ៕
មតិយោបល់