កាលពីថ្ងៃទី០៤ខែវិច្ឆិកា ឆ្នាំ ២០១៣ កន្លងទៅ ក្រុមហ៊ុន BlackBerry បានព្យាយាមប្រែក្លាយខ្លួនទៅជាក្រុមហ៊ុនឯកជន ប៉ុន្តែត្រូវបរាជ័យ ហើយក៏សម្រេចចិត្តផ្លាស់ប្ដូរថ្នាក់ដឹកនាំកំពូល។ ពេលនោះ លោក Thorsten Heins ដែលជានាយកប្រតិបត្តិក៏បានដើរចេញពីក្រុមហ៊ុន ដោយត្រូវជំនូសដោយលោក John Chen ឲ្យឡើងជានាយកប្រតិបត្តិស្ដីទី។ ក្រោយពីបម្រើការងារបានរយៈពេល ២ខែនៅពេលនេះ ក្រុមហ៊ុនក៏បានសម្រេច ឲ្យលោក John Chen ឡើងជានាយកប្រតិបត្តិពេញសិទ្ធិ។
នៅក្នុងសេចក្ដីប្រកាសរបស់ក្រុមហ៊ុនផលិតទូរស័ព្ទដៃកាណាដាមួយនេះបានឲ្យដឹងថា ក្រោយពេលដែលលោក Chen ចូលកាន់តំណែតជានាយកប្រតិបត្តិ ឃើញថា ក្រុមហ៊ុន BlackBerry អាចនឹងដំណើរការល្អឡើងវិញ ដោយថ្មីៗនេះលោកបានសហការជាមួយនឹងក្រុមហ៊ុនផ្គត់ផ្កង់ធំបំផុតរបស់ Apple គឺ Foxconn ក្នុងការផលិតស្មាតហ្វូន។
អ្នកនាំពាក្យរបស់ BlackBerry បាននិយាយថា ក្រុមហ៊ុនមានជំនឿចិត្តទៅលើនាយកប្រតិបត្តិថ្មីនេះ ថាគាត់នឹងដោះស្រាយវិបត្តិក្រុមហ៊ុនបានក្នុងពេលឆាប់ៗនេះ។
គួរបញ្ជាក់ផងដែរថា ក្រុមហ៊ុន BlackBerry ស្ទើរតែក្ស័យធន ដោយបានដកលុយបម្រុងពីធនាគារមកប្រើប្រាស់ ប៉ុន្តែនៅពេលនេះ អាចនឹងដំណើរការល្អឡើងវិញ ព្រោះថាក្រុមហ៊ុនបានសម្រេចចិត្តផលិតស្មាតហ្វូនតម្លៃទាប ដោយសហការជាមួយ Foxconn៕
មតិយោបល់