ទំហំពាណិជ្ជកម្ម របស់ប្រទេសកម្ពុជា បានកើនឡើងដល់ ១៥,៩ពាន់លានដុល្លារអាមេរិក នៅក្នុងឆ្នាំ២០១៣ ដែលបានកើនឡើង ១៨ភាគរយ ពី ១៣,៤ពាន់លានដុល្លារអាមេរិកនៅក្នុងឆ្នាំ ២០១២។ នេះបើយោងតាម របាយការណ៍របស់ ក្រសួងពាណិជ្ជកម្ម។
យោងតាមការចុះផ្សាយរបស់ AKP ជាភាសាអង់គ្លេសបានឲ្យដឹងថា ការនាំចេញរបស់ប្រទេសកម្ពុជាមានតម្លៃ ៦,៩ពាន់លានដុល្លារអាមេរិក ពោលគឺកើនឡើង ២៦ភាគរយ បើប្រៀបធៀបនឹង ៥,៥ ពាន់លានដុល្លារអាមេរិក នៅក្នុងឆ្នាំ ២០១២ ខណៈពេលដែលការនាំចូល មានចំនួន ៩ពាន់លានដុល្លារ អាមេរិក ពោលគឺកើនឡើងប្រហែល ១៤ភាគរយ បើធៀបនឹង ៧,៩ពាន់លានដុល្លារអាមេរិកនៅកាលពីឆ្នាំ ២០១២។
សព្វថ្ងៃ គោលដៅពាណិជ្ជកម្មដ៏ធំរបស់កម្ពុជា រួមមាន សហរដ្ឋអាមេរិក សហភាពអឺរ៉ុប ប្រទេសចិន ថៃ វៀតណាម សិង្ហបុរី ម៉ាឡេស៊ី ជប៉ុន កូរ៉េខាងត្បូងជាដើម។
នៅក្នុងរយៈពេល ១១ខែដំបូងឆ្នាំ ២០១៣កម្ពុជា បាននាំចេញទៅកាន់សហរដ្ឋអាមេរិក ២,៥៧ ពាន់លានដុល្លារអាមេរិក ខណៈដែលកម្ពុជាបាននាំចូល ពីសហរដ្ឋអាមេរិក បានលើសពី ២១៤លានដុល្លារ សហរដ្ឋអាមេរិក។ ក្នុងរយៈពេល ដូចគ្នានេះដែរ កម្ពុជាបាននាំចូល ពីប្រទេសជប៉ុន ១៩១លានដុល្លារ អាមេរិក បានធ្លាក់ចុះ ១០,៦ភាគរយ ហើយការនាំចេញទៅកាន់ប្រទេសជប៉ុន ៥៤៥លានដុល្លារ អាមេរិក គឺកើនឡើង ៤៥ភាគរយ។
ផលិតផលនាំចេញចម្បងរបស់ប្រទេសកម្ពុជា រួមមាន សម្លៀកបំពាក់ អង្ករ កៅស៊ូ ម្រេច និង ផលិតផលផ្សេងទៀត ហើយការនាំចូលប្រេងសាំង គឺមានសម្ភារសំណង់ រថយន្ត និងធាតុផ្សេងទៀត៕
មតិយោបល់