ភ្នំពេញ៖ ធនាគារជាតិនៃកម្ពុជា នៅថ្ងៃអង្គារម្សិលមិញនេះ បានឲ្យដឹងថា សេដ្ឋកិច្ចរបស់ប្រទេសកម្ពុជាបានកើនឡើង ៧ភាគរយ នៅក្នុងឆ្នាំ ២០១៣ បើទោះបីជាកើតមានបញ្ហានយោបាយក្រោយពេលបោះឆ្នោតថ្ងៃទី២៨ខែកក្កដាក្ដី។
យោងតាមទីភ្នាក់ងារព័ត៌មានចិន ស៊ិនហួ បានឲ្យដឹងថា កំណើនសេដ្ឋកិច្ចនេះមានកម្រិតទាបជាងឆ្នាំ ២០១២ បន្ដិច ដោយមានចំនួន ៧,២ភាគរយ។ “នៅក្នុងឆ្នាំ ២០១៣ សេដ្ឋកិច្ចកម្ពុជា សម្រេចបានលទ្ធផលគួរជាទីកោតសសើរជាមួយនឹងកំណើនផលិត ផលក្នុងស្រុកសរុប ៧ភាគរយ”។ នៅជាសេចក្ដីថ្លែងការណ៍របស់ ធនាគារជាតិនៃកម្ពុជា ព្រមទាំងបានបញ្ជាក់បន្ថែមថា ការកើន ឡើងនេះដោយសារតែមានការវិនិយោគនៅក្នុងប្រទេស ជាពិសេសគឺវិស័យសំណង់ និងទេសចរណ៍។
យោងតាមរបាយការណ៍របស់រដ្ឋាភិបាលបានឲ្យដឹងថា ប្រទេសអាស៊ីអាគ្នេហ៍មួយនេះបានទាក់ទាញគម្រោងវិនិយោគក្នុងស្រុក និងបរទេសដែលគិតជាទឹកប្រាក់មានចំនួន ៤,៩ពាន់លានដុល្លារអាមេរិក ដោយបានកើនឡើង ៦៩ភាគរយ។
វិស័យសំណង់បានទាក់ទាញការវិនិយោគសរុប ២,៤៨ពាន់លានដុល្លារអាមេរិក នៅក្នុងរយៈពេល ១១ខែដំបូង ដោយបានកើនឡើង ២៧ភាគរយ ខណៈដែលឧស្សាហកម្មគ្មានផ្សែង(វិស័យទេសចរណ៍) ទទួលបានភ្ញៀវទេសចរណ៍បរទេសចំនួន ៣,៤លាននាក់ នៅក្នុងរយៈពេល ១០ខែដំបូង (បើតាមសំដីរបស់លោកនាយករដ្ឋមន្ត្រីហ៊ុន សែន បានឲ្យដឹងកម្ពុជាទទួលបានភ្ញៀវទេសចរណ៍ជាង ៤,២លាននាក់ក្នុងឆ្នាំ ២០១៣) ដោយបានកើនឡើង ១៨ភាគរយ។
នៅក្នុងរបាយការណ៍របស់ធនាគារជាតិនៃកម្ពុជា បានឲ្យដឹងថា កម្ពុជាបានរក្សាកំណើនខ្ពស់ និងស្ថិរភាពនៃអតិផរណា បានល្អ បើទោះបីជាមានជម្លោះផ្នែកនយោបាយបន្ដិចក្ដី៕
មតិយោបល់