គ្រាន់តែឡើងកាន់តំណែងជានាយកប្រតិបត្តិ Apple ជំនួសលោក Steve Jobs ភ្លាម លោក Tim Cook ក៏បានប្ដឹងក្រុមហ៊ុន Samsung រឿងរំលោភប៉ាតង់តែម្ដង ដើម្បីយកមុខយកម៉ាត់ ប៉ុន្តែធាតុពិតនោះគឺមិនដូចអ្វីដែលយើងបានគិតនោះទេ។
យោងតាមការចុះផ្សាយរបស់ទីភ្នាក់ងារព័ត៌មាន Reuters បានឲ្យដឹងថា លោក Tim Cook បានប្ដឹងក្រុមហ៊ុន Samsung ភ្លាមក្រោយពេលឡើងកាន់តំណែង ប៉ុន្តែក្រោយមក បន្ទាប់ពីលោក Steve Jobs ស្លាប់ទៅ Cook ក៏បានថ្លែងឲ្យដឹងថា លោកមិនបានតាំងចិត្តប្ដឹង Samsung នោះទេ ព្រោះថា Samsung គឺជាអ្នកផ្គត់ផ្គង់របស់ខ្លួន ព្រមទាំងជាដៃគូទៀត ខ្លាចប៉ះពាល់ដល់អាជីវកម្ម។
លោក Cook បានបន្តទៀតថា លោក Jobs ចេះតែទទូចឲ្យលោកដាក់ពាក្យប្ដឹង Samsung ព្រោះថាគាត់បានយល់ដឹងពីច្បាប់ប៉ាតង់ និងទំនាក់ទំនងរវាង Apple និង Samsung ច្បាស់។
ពេលនោះ Cook ក៏បានចេញសេចក្ដីប្រកាសប្ដឹង Samsung តែម្ដង ហើយបណ្ដឹងនោះក៏បានអូសបន្លាយរហូតមកដល់ពេលនេះ។
លោក Tim Cook បានបញ្ជាក់ទៀតថា លោក Jobs គាត់បាននិយាយថា ការប្ដឹងនេះគឺមានផលប្រយោជន៍ទាំងសងខាង ពោលគឺទាំង Samsung និង Apple ជាពិសេសគឺ Apple តែម្ដង ប៉ុន្តែលោក មិនបានបញ្ជាក់លម្អិតនោះទេ។
គួរបញ្ជាក់ផងដែរថា រហូតមកដល់ពេលនេះ ក្រុមហ៊ុន Samsung មិនព្រមទទួលស្គាល់ថាខ្លួនជាអ្នកចាញ់ក្ដីនោះទេ បើទោះបីជាតុលាការបានរកឃើញថាខ្លួនបានរំលោភលើប៉ាតង់របស់ Apple ក្ដី៕
មតិយោបល់