អាល្លឹម៉ង់៖កីឡាករ​វ័យ ៣០ ឆ្នាំ​សញ្ជតិហូឡង់ ​ដែលលេងមុខងារ​ជា​ស្លាបប្រយុទ្ធ បានបន្តកុងត្រា​ថ្មីរបស់ខ្លួន ជាមួយនឹងក្លិប​​ជើង​ខ្លាំងរបស់អាល្លឺម៉ង់ Bayern Munich រហូតដល់ថ្ងៃទី ៣០ ខែ មិថុនា ឆ្នាំ ២០១៧ ខាងមុខ។​

កីឡាករ Robben បានចូលរួមលេងនៅក្លិប Bayern Munich ​ខណៈដែលផ្ទេរពីក្លិប អធិរាជស Real Madrid នៅក្នុងឆ្នាំ ២០០៩ និងជួយ​ក្លិប​ឲ្យឈ្នះពានរង្វាន់ចំនួន ៨ ក្នុងអំឡុងពេលដែលគាត់នៅ Allianz Arena និងជួយ​​សាងរឿងប្រវត្តិសាស្ត្រ​ឲ្យក្លិប Bayern Munich ក្នុងនោះរួមមាន​ឈ្នះពានរង្វាន់ Bundesliga Champions League និង DFB-Pokal ។​

ក្រៅពីនេះ​អតីត​ កីឡាកររបស់ Chelsea និង PSV Eindhoven បានជួយ​ឲ្យ Bayern Munich ឈ្នះពានរង្វាន់ Champions League ដោយបំបាក់ក្លិប Borussia Dortmund ខណៈស្វែងរកគ្រាប់បាល់ នៅនាទី ៨៩ នោះ។​ ថ្លែង​ទៅកាន់គេហទំព័រក្លិប Robben បានឲ្យដឹងថា “ខ្ញុំពិតជារីករាយខ្លាំងណាស់ ដែលឥឡូវនេះ​យើងបាន​ចុះកិច្ចព្រមព្រៀង​ លើកុងត្រា​ចាស់ ជាមួយនឹងក្លិប Bayern Munich ហើយនេះជារដូវកាលទី ៥ របស់ខ្ញុំហើយ ដែលលេង​ឲ្យ Bayern Munich នោះ” ។​

ទន្ទឹមជាមួយនឹងគ្នានេះ មេធំរបស់ ក្លិបនេះ លោក​ Karl-Heinz Rummenigge បាន​ឲ្យដឹងថា “យើងមានអារម្មណ៍រីករាយយ៉ាងខ្លាំង ដែល Arjen Robben បន្តកុងត្រា​រហូតដល់ឆ្នាំ ២០១៧” ។​ លោកបានបន្តថា កីឡាករ​រូបនេះ ពិតជាកីឡាករដ៏ល្អខ្លាំងណាស់ របស់ក្លិប Bayern Munich ហើយសង្ឈឹមថា គាត់អាច​នឹងបន្ត លេង ​ប៉ុន្មានឆ្នាំចុងក្រោយនេះ ឲ្យក្លិប អាល្លឹម៉ង់កាន់តែមាន​ឥទ្ធិពល៕​