សរុបទាំងអស់ ២៥នាក់ ក្នុងនោះមានសិស្ស ១២នាក់ គ្រូបង្រៀន ២នាក់ និងអ្នកបម្រើការលើនាវាចំនួន ៣នាក់ ត្រូវបានក្រុមសង្គ្រោះអះអាងថា បានស្លាប់ ចំណែកមនុស្ស ១៧៩នាក់ត្រូវបានជួយសង្គ្រោះ និង ២៧១នាក់ផ្សេងទៀតកំពុងបាត់ខ្លួននៅឡើយរហូតមកដល់ថ្ងៃសុក្រ ទី១៨ ខែមេសា ឆ្នាំ ២០១៤ នេះ នៅក្នុងឧបទ្ទវហេតុ លិចនាវាដឹកសិស្ស។ នេះបើយោងតាមការចុះផ្សាយរបស់ទីភ្នាក់ងារព័ត៌មានចិន ស៊ិនហួ។
នាវាដឹកអ្នកដំណើរ ដែលភាគច្រើនជាសិស្សខាងលើនេះ បានលិចនៅជិតឆ្នេរសមុទ្រភាគនិរតី នៃប្រទេសកូរ៉េខាងត្បូង កាលពីថ្ងៃពុធ កន្លងទៅនេះ ដោយមានមនុស្សជិះនៅលើនោះរហូត ដល់ទៅ ៤៧៥នាក់ ហើយក្នុងនោះដែរ ៣២៥នាក់ ជាសិស្សវិទ្យាល័យ រួមជាមួយគ្រូបង្រៀន ពួកគេ ១៥នាក់ ដែលបាន កំពុងធ្វើដំណើរទៅបំពេញទស្សនកិច្ចសិក្សារយៈពេល ៤ថ្ងៃ។
នាវាខាងលើនេះបានចាកចេញពីកំពង់ផៃអ៊ីនជឿន កាលពីយប់ ថ្ងៃអង្គារ ហើយនៅម៉ោង ៨ និង ៥២នាទីព្រឹក ថ្ងៃពុធ ឆ្មាំសមុទ្រ ទទួលបានទូរស័ព្ទទាក់ទងសុំ ជំនួយពី នាវាដឹក សិស្ស បន្ទាប់ពីវាធ្វើការបត់ប្តូរទិសដៅភ្លាមៗកាលពីវេលាម៉ោង ៨ និង ៤៨នាទី។ នាវាបានព្យាយាមធ្វើដំណើរ ត្រឡប់មកពីកំពង់ផែវិញ តែត្រូវលិចនៅវេលាម៉ោង ជាង ១១ព្រឹកថ្ងៃពុធ ហើយគ្មាននរណាម្នាក់បានដឹងពីមូលហេតុដែលនាំឲ្យនាវានោះ ប្តូរទិសដៅភ្លាមៗ ដោយមូលហេតុអ្វីនោះទេ។
ពីអាជ្ញាធរដែនសមុទ្រកូរ៉េខាងត្បូង បានឲ្យដឹងថា នាវាលិចគឺត្រូវបានគេ សន្និដ្ឋានថា បណ្តាលមកពីការប្តូរទិសដៅភ្លាមៗ ដែលបណ្តាលឲ្យ រថយន្តតូច ធំចំនួន ១៨០គ្រឿង និង កុងតឺន័រ ដែល មានទម្ងន់រហូតដល់ទៅ ១.១០០តោននៅលើនាវានោះ ចល័តទីទៅផ្ទៃម្ខាងនៃ នាវា ហើយបន្ទាប់ មកនាវាក៏ចាប់ផ្តើមផ្អាងទៅម្ងាង រហូតដល់ ចាប់ផ្តើមលិចបន្តិចម្តងៗក្នុងរយៈ ពេលតែជាងពីរម៉ោងប៉ុណ្ណោះ៕
មតិយោបល់