កំពង់ឆ្នាំង៖ ក្រោយពីស្វាមី និងក្រុមគ្រួសារបានយកចិត្តទុកដាក់ព្យាបាលជម្ងឺមហារីកថ្លើមជាង២ឆ្នាំ យ៉ាងអស់លទ្ធភាពទាំងក្នុងប្រទេសនិងក្រៅប្រទេស នៅតែមិនជាឡើយ នៅវេលាម៉ោង០១និង៤២នាទីរំលងអាធ្រាតឈានចូលថ្ងៃទី២១ ខែមេសា ឆ្នាំ២០១៤ លោកស្រីវរៈសេនីយឯក ប្រាក់ សៅនី ស្នងការរងនគរបាលខេត្តកំពង់ឆ្នាំង ទទួលបន្ទុកយេនឌ័រ ទទួលមរណៈភាព ក្រោមការសោកស្តាយអាឡោះអាល័យយ៉ាងខ្លាំងពីសំណាក់ក្រុមគ្រួសារ និងមន្ត្រីនគរបាលទូទាំងខេត្តកំពង់ឆ្នាំង។
លោកឧត្តមសេនីយត្រី អាត់ ខែម ស្នងការនគរបាលខេត្តកំពង់ឆ្នាំងបានអោយដឹងថា៖លោកស្រី ប្រាក់ សៅនី កើតនៅថ្ងៃទី២០ ខែមីនា ឆ្នាំ១៩៦៩ មានស្រុកកំណើតនៅភូមិជីខ្មា ឃុំជីខ្មា ស្រុកទ្រាំង ខេត្តតាកែវទីលំនៅបច្ចុប្បន្ននៅភូមិទ្រាជើង ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ស្វាមីលោកស្រីគឺ លោកវរៈសេនីយទោ សំ សិទ្ធី ជាអធិការនគរបាលក្រុងកំពង់ឆ្នាំង មានកូនក្នុងបន្ទុក៤នាក់ ប្រុស២ស្រី២។
ប្រវត្តិការងារ លោកស្រីបានចូលបំរើជាកងកម្លាំងនគរបាលជាតិនៅថ្ងៃទី០១ ខែមេសា ឆ្នាំ១៩៨៧ មានតួនាទីជាគ្រូពេទ្យប្រចាំស្នងការដ្ឋាននគរបាលខេត្តកំពង់ឆ្នាំង។ដោយមានស្នាដៃល្អក្នុងការងារជាបន្តបន្ទាប់ លោកស្រីបាន ក្លាយជានាយការិយាល័យប្រឆាំងការជួញដូរនិងការពារអនិតិជននៃស្នងការដ្ឋាននគរបាលខេត្ត នៅឆ្នាំ២០០៥ និងត្រូវបានទទួលតំណែងជាស្នងការរងនគរបាលខេត្តទទួលបន្ទុកយេនឌ័រ ក្នុងខែមិនា ឆ្នាំ២០១១។នៅក្នុងការបំពេញភារកិច្ចជាង២៧ឆ្នាំកន្លងមក លោកស្រីទទួលបានមេដាយការពារជាតិចំនួន៣គឺ មេដាយមាស១ មេដាយប្រាក់១ មេដាយសំរិត១ និងទទួលបានមេដាយមាសការងារចំនួន២គ្រឿង ព្រមទាំងទទួលបានបណ្ណ័សរសើរមួយចំនួនផងដែរ ។
នៅវេលាម៉ោង២និង៣០នាទីរសៀលថ្ងៃទី២១ ខែមេសានេះ លោក ឈួរ ចន្ទ័ឌឿន អភិបាលខេត្ត លោកអភិបាលរងខេត្ត លោកមេបញ្ជាការកងកម្លាំងប្រដាប់អាវុធទាំងអស់ និងមន្ត្រីរាជការគ្រប់អង្គភាពជុំវិញខេត្ត បានអញ្ជើញចូលរួមរំលែកមរណៈទុក្ខនិងគោរពវិញ្ញាណខន្ធ័លោកស្រី នៅគេហដ្ឋានសពក្នុងភូមិទ្រាជើង ឃុំស្រែថ្មី ស្រុករលាប្អៀរ។
លោកវរៈសេនីយទោ សំ សិទ្ធី ជាស្វាមីសពបានអោយដឹងថាៈ ពិធីបុណ្យសពនឹងប្រារពធ្វើចំនួន៤ថ្ងៃ ពីថ្ងៃទី២១ ដល់២៤ ខែមេសា ហើយត្រូវធ្វើពិធីបូជាសពនៅថ្ងៃទី២៤ខែមេសា វេលាម៉ោង៧យប់ នៅលើព្រះមេរុ ក្នុងលំនៅដ្ឋានរបស់សព។ ក្រុមគ្រួសារសពក៏សូមគោរពអញ្ជើញញាតិមិត្តជិតឆ្ងាយរបស់សព មេត្តាចូលរួមក្នុងពិធីបុណ្យតាមកម្មវិធីខាងលើដោយមេត្រីភាពតាមការគួរ សូមអរគុណ៕
មតិយោបល់