ក្រុមហ៊ុនហ្វាំងឡង់ Nokia បានបង្ហាញពីសេចក្ដីរំភើបជាមួយនឹង របាយការណ៍ប្រាក់ចំណេញសម្រាប់ត្រីមាសដំបូង ឆ្នាំ ២០១៤។
នៅក្នុងរបាយការណ៍បានបង្ហាញថា ប្រាក់ចំណេញប្រតិបត្តិការនៅក្នុងត្រីមាសទី១ បានកើនឡើង ១០ភាគរយ បើធៀបនឹងឆ្នាំមុន ដោយមានចំនួន ២១៦លានអឺរ៉ូ ប្រហែលនឹង ២៩៩លានដុល្លារអាមេរិក។ ប្រាក់ចំណេញនេះគឺទទួលបានភាគច្រើនពីក្រុមហ៊ុន NSN ដែលជាក្រុមហ៊ុនផ្គត់ផ្គង់គ្រឿងបរិក្ខាទូរគមនាគមន៍។
ក្រុមអ្នកវិភាគជាច្រើនបានរំពឹងថា ប្រាក់ចំណេញរបស់ក្រុមហ៊ុន Nokia មានត្រឹមតែ ១៤៣លានអឺរ៉ូប៉ុណ្ណោះ ប៉ុន្តែធាតុពិតគឺលើសពីការរំពឹងទុក។
ស្របពេលប្រកាសនូវភាពជោគជ័យសម្រាប់ត្រីមាសដំបូងនេះ ក្រុមហ៊ុន Nokia ក៏បានបញ្ជាក់ឲ្យដឹងពីដំណឹងល្អមួយផងដែរ គឺថា លោក Rajeev Suri នាយកប្រតិបត្តិក្រុមហ៊ុន NSN ដែលជាបុត្រសម្ព័ន្ធរបស់ខ្លូន នឹងត្រូវតែងតាំងជានាយកប្រតិបត្តិថ្មីរបស់ Nokia៕
មតិយោបល់