អង្ករ ១៥តោន ទឹកត្រី១ពាន់យួរ មី១ពាន់កេស និងប្រេងឆា១៤០កេស ជាអំណោយរបស់ក្រុមរ៉ូតារីក្លឹបអង្គរ ខេត្តសៀមរាបត្រូវបានលោកស្រី អាណា ប្រធានអង្គររ៉ូតារីក្លឹប ខេត្តសៀមរាប នាំយកមកប្រគល់ជូនដល់គណៈ កម្មាធិការសាខាកាកបាទក្រហមខេត្តសៀមរាប កាលពីចុងសប្តាហ៍នារសៀលថ្ងៃទី១៦ ខែឧសភា ឆ្នាំ២០១៤ក្រោម វត្តមានរបស់ ឯ.ឧ ឃឹម ប៊ុនសុងប្រធានគណៈកម្មាធិការសាខាកាកបាទក្រហមកម្ពុជាខេត្ត និង ជាអភិបាលនៃ គណៈអភិបាលខេត្ត ព្រមទាំងលោកជំទាវ អស់លោក លោកស្រីជាសមាជិកគណៈកម្មាធិការសាខាកាកបាទក្រហម ជាច្រើនរូបទៀត នៅទីស្នាក់ការសាខាកាកបាទក្រហមខេត្តសៀមរាប ។
បន្ទាប់ពីមតិស្វាគមរបស់លោក ស៊ុំ សំអន នាយកប្រតិបត្តិសាខាកាកបាទក្រហមខេត្តសៀមរាប រួចមក មានប្រសាសន៍នោះដែរលោកស្រី អាណា បានបញ្ជាក់ថាដោយទទួលបាននូវការអំពាវនាវរបស់ សម្តេចតេជោ ហ៊ុន សែន នាយករដ្ឋមន្ត្រី និង សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ប្រធានកាកបាទក្រហមកម្ពុជា ក៏ដូចអាជ្ញាធរ ខេត្ត និង សាខាកាកបាទក្រហមកម្ពុជាខេត្តសៀមរាបក្នុងការចូលរួមជាមួយចលនាមនុស្សធម៌កាកបាទក្រហមកម្ពុជាក្នុងឱកាសខួបលើកទី១៥១ ទិវាពិភពលោកកាកបាទក្រហម អឌ្ឍចន្ទក្រហម ដើម្បីជួយដល់កាកបាទក្រហមកម្ពុជា ដែលមានសម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន យកទៅផ្តល់ជូនដល់បងប្អូន ប្រជាពលរដ្ឋ ដែលជួបការលំបាក រងគ្រោះដោយធម្មជាតិ និង គ្រោះថ្នាក់ផ្សេងៗ ទើបថ្ងៃនេះក្រុមរ៉ូតារីក្លឹបអង្គរ ខេត្តសៀមរាប បាននាំយកស្បៀងអាហារ គ្រឿងឧបភោគបរិភោគ រួមមានអង្ករចំនួន ១៥តោន ទឹកត្រី១ពាន់យួរ មីយើង១ពាន់កេស និងប្រេងឆា ១៤០កេស ដើម្បីចូលរួមជាមួយសកម្មភាពនៃចលនាកាកបាទក្រហមកម្ពុជា ក្នុងការចុះជួយសង្គ្រោះ ប្រជាពលរដ្ឋរងគ្រោះ នៅលើភូមិសាស្ត្រ ខេត្តសៀមរាប ។
ក្នុងនាមតំណាងឲ្យសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចជាប្រជាពលរដ្ឋរងគ្រោះក្នុងខេត្តសៀមរាប ឯ.ឧ ឃឹម ប៊ុនសុង ក៏បានធ្វើការសម្តែងនូវអំណរគុណ ចំពោះទឹកចិត្តដ៏សប្បុរសធម៌ របស់លោកស្រី អាណា និង សហការី ក្រុមរ៉ូតារីក្លឹបអង្គរ ខេត្តសៀមរាបដែលសបញ្ជាក់ពីទឹក ចិត្តដ៏មនុស្សធម៌ ដើម្បីចូលរួមជាមួយសកម្មភាពនៃចលនាកាកបាទក្រហមកម្ពុជា ក្នុងការចុះជួយសង្គ្រោះ ប្រជាពលរដ្ឋរងគ្រោះ នៅលើភូមិសាស្ត្រ ខេត្តសៀមរាប ។
ឯកឧត្តមក៏បានលើកឡើងថា ក្នុងកាយវិកាដ៏មនុស្សធម៌នេះ ការពីឆ្នាំ២០១៣កន្លង មករបស់ក្រុមរ៉ូតារីក្លឹមអង្គរ ក្នុងកាយវិការដ៏ សប្បុរសធម៌ ក្នុងការឆ្លើយតបបានទាន់ពេលវេលា ទៅនឹងតម្រូវការរបស់ប្រជាពលរដ្ឋរងគ្រោះ ក្នុងការចុះជួយសង្គ្រោះប្រជាជនរងគ្រោះនៅខេត្តសៀមរាប ។ឯ.ឧ ឃឹម ប៊ុនសុងក៏បានគូសបញ្ជាក់ ថា តាមរយៈអំណោយសប្បុរសធម៌ របស់បងប្អូនសប្បុរសជនទាំងអស់ក្នុងខេត្ត និង ក្រុមហ៊ុន អង្គការនានា ត្រូវបានគណៈកម្មាធិការសាខាកាកបាទក្រហមកម្ពុជាខេត្ត បានធ្វើសកម្មភាពជាបន្ទាន់នាំយកទៅចែកជូនដល់បងប្អូនប្រជា ពលរដ្ឋរងគ្រោះនៅតាមបណ្តាក្រុង ស្រុក ។ ក្នុងនោះឯកឧត្តម ក៏បានលើកឡើងថា អំណោយជាស្បៀង អាហារ និង ថវិកា ដែលទទួលបានពីក្រុមរ៉ូតារីក្លឹមអង្គរខេត្តសៀមរាប នៅពេលនេះ សាខាកាកបាទក្រហមកម្ពុជាខេត្ត នឹងនាំយកទៅចែកជូនដល់បងប្អូនប្រជាពលរដ្ឋរងគ្រោះ ឲ្យបានទាន់ពេលវេលា ដើម្បីឆ្លើយតបទៅនឹងសកម្មភាពនៃការ ចាំបាច់ ក្នុងការដោះស្រាយបញ្ហាជីវភាពរស់នៅ របស់បងប្អូនដែលទទួលរងគ្រោះ និង ដើម្បីការបង្កើនូវថវិកាទ្រទ្រង់សកម្ម ភាពចលនាមនុស្សធម៌កាកបាទក្រហមកម្ពុជា ក្នុងការយកទៅបម្រើការសង្គ្រោះដល់ប្រជាពលរដ្ឋរងគ្រោះ និង ងាយរងគ្រោះជាដើម ៕
មតិយោបល់