អង់គ្លេស៖ខ្សែប្រយុទ្ធរបស់ខក្លិបតោខៀវ កីឡាករ Samuel Eto នៅតែមានអារម្មណ៍ថា អាចរួមចំណែកដ៏មានអត្ថន័យ ក្នុងកីឡាបាល់ទាត់អឺរ៉ុប បើទោះបីមានការផ្តល់យោបល់ថាគាត់ គឺអស្តង្គត់ ក្នុងអាជីពក៏ដោយ។
ថ្មីៗនេះ ភាពចម្រូងចម្រាស់ សន្ធឹកសន្ធាប់ បន្ទាប់ពីអ្នកចាត់ការទូទៅក្លិប តោខៀវ Jose Mourinho បានចោទសួរ និងប៉ះពាល់ដល់ បញ្ហាអាយុជ្រេ របស់កីឡាករសញ្ជាតិកាម៉ារ៉ូន ។ ក្រោយមក កីឡាករស្បែកខ្មៅរូបនេះ បានខឹង និងរិះគន់ទៅលើលោក Mourinho ថាល្ងង់ និងជាអាយ៉ង ។
កីឡាករ Samuel Eto បានប្រាប់ដល់សហព័ន្ធកីឡាបាល់ទាត់ ទ្វីបអាហ្វ្រិក ថា “ផ្ទុយពីអាយ៉ង មួយបាននិយាយអំពីអាយុរបស់ខ្ញុំ តែធាតុពិតបើទោះបីជាចាស់មែន តែ កំលាំង និងរាងកាយខ្លាំងដូចគោឈ្មោល ដោយមិនចាញ់យុវវ័យប៉ុន្មាន” ។
សម្រាប់ការបង្ហាញខ្លួន Samuel Eto នៅក្លិបតោខៀវ នារដូវកាលបញ្ចប់ថ្មីៗនេះ បានចូលរួមចំណែកលេងក្នុងលីកអង់គ្លេសបាន ១៦ ដង រកគ្រាប់បាល់បាន ៩ គ្រាប់ ដែលបានបង្ហាញទម្រង់លេងល្អឥតខ្ជោះ។
សូមបញ្ជាក់ផងដែរថា កីឡាករសញ្ជាតិកាម៉ារ៉ូននេះ ផុតកំណត់កុងត្រានៅរដូវកាលនេះ ដោយកុងត្រារបស់ខ្លួនជាមួយនឹងក្លិបតោខៀវមានរយៈពេលតែមួយឆ្នាំតែប៉ុណ្ណោះ ខណៈមហិច្ចតារបស់ខ្លួន ចង់លេងនៅកម្រិតកំពូលក្នុងក្របខណ្ឌ Champions League តែមិនទាន់បើកប្រអប់ថាខ្លួនគួរទៅលេងនៅក្លិបណាមួយ នៅឡើយ បន្ទាប់ពីបញ្ចប់ ជាមួយនឹងតោខៀវ នៅពេលខាងមុខ ៕
មតិយោបល់