ក្រោយពេលដែលតុលាការសម្រេចថាក្រុមហ៊ុន Samsung បានរំលោភប៉ាតង់ចំនួន ៣របស់ក្រុមហ៊ុន Apple មក ក្រុមហ៊ុនផលិត iPhone មួយនេះ កំពុងស្វែងរកការហាមឃាត់ការលក់ទូរស័ព្ទទំនើបម៉ូដែលចាស់ៗមួយចំនួនរបស់ក្រុមហ៊ុន Samsung នៅអាមេរិក។ នេះបើយោងតាមការចុះផ្សាយរបស់ Bloomberg។
កាលពីថ្ងៃទី២ ខែឧសភា ក្រុមហ៊ុន Apple បានទទួលសំណងចំនួន ១៩៩លានដុល្លារអាមេរិកនៃសំណងចំនួន ២,២ពាន់លានដុល្លារអាមេរិកដែលខ្លួនបានទាមទារនោះ បានកំណត់អត្តសញ្ញាណផលិតផលចំនួន៩ ដែលខ្លួនមានបំណងហាមឃាត់ការលក់នៅក្នុងឯកសារមួយកាលពីថ្ងៃសៅរ៍ ដែលបានផ្ញើជូនចៅក្រមសាលាដំបូងរបស់អាមេរិក គឺលោកស្រី Lucy Koh នៅទីក្រុង San Jose រដ្ឋកាលីហ្វ័រនីញ៉ា។
ឧបករណ៍ចំនួន៩ម៉ូដែលរបស់ក្រុមហ៊ុន Samsung ដែលក្រុមហ៊ុន Apple បានកំណត់ទិសដៅសម្រាប់ការហាមឃាត់លក់នៅអាមេរិកនេះ រួមមាន ទូរស័ព្ទដៃទំនើបម៉ូដែល Admire ម៉ូដែល Galaxy Nexus ម៉ូដែល Galaxy Note ម៉ូដែល Galaxy Note 2 ម៉ូដែល Galaxy S2 ម៉ូដែល Galaxy S2 Epic 4G Touch ម៉ូដែល Galaxy S2 Skyrocket ម៉ូដែល Galaxy S3 និងទូរស័ព្ទដៃទំនើបម៉ូដែល Stratosphere៕
មតិយោបល់