ភ្នំពេញ ៖ថ្ងៃទី២៧ ខែឧសភា ឆ្នាំ២០១៤ នៅក្នុងសេចក្តីថ្លែងការណ៍ដំបូងបំផុត បន្ទាប់ពីរដ្ឋប្រហារ យោធានៅប្រទេសថៃកាលពី ថ្ងៃទី ២២ ខែឧសភា ឆ្នាំ ២០១៤ នោះ នាយករដ្ឋមន្ត្រីកម្ពុជាបានថ្លែងថា កម្ពុជាចាត់ទុកសភាព ការណ៍នៅព្រះរាជាណាចក្រថៃ ជា កិច្ចការ ផ្ទៃក្នុងរបស់ថៃ ហើយកម្ពុជាមិន លូកលាន់ចូលកិច្ច ការផ្ទៃក្នុងរបស់ថៃឡើយ និងបានបញ្ជាក់ថាកម្ពុជាមិនមែន ជាទីតាំង សម្រាប់ការផ្តល់ ឲ្យប្រទេសណាមួយបង្កើតរដ្ឋាភិបាល និរទេសនៅក្នុងប្រទេសរបស់ខ្លួននោះទេ។
នៅក្នុងពិធីប្រគល់សញ្ញាបត្រថ្នាក់បរិញ្ញា និងថ្នាក់បរិញ្ញាបត្រជាន់ខ្ពស់ និងប្រកាសឲ្យ អនុវត្តន៍ជាផ្លូវការផែនការយុទ្ធសាស្ត្រ ៥ ឆ្នាំ ២០១៤-២០១៨ របស់សាកលវិទ្យាល័យភូមិន្ទភ្នំ ពេញ នៅមជ្ឈមណ្ឌលសន្និបាត និងពិព័រណ៍កោះពេជ្រ កាលពីថ្ងៃទី ២៧ ខែឧសភាឆ្នាំ ២០១៤ សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ឥឡូវនេះរដ្ឋាភិបាលស៊ីវិល ដែលចេញពីការបោះឆ្នោត ត្រូវ បានផ្តួលរំលំ និងកាន់អំណាចដោយរដ្ឋាភិបាលយោធា ។ ច្បាប់ អាជ្ញាសឹកត្រូវបានប្រកាសថា ហាមការជួបជុំចាប់ពី ៥ នាក់ឡើង ទៅ ដូចនេះឥរិយាបថរបស់ យើងគឺចាត់ទុកបញ្ហានេះជាបញ្ហាផ្ទៃក្នុងរបស់ប្រទេសថៃ ។ សម្តេចនាយករដ្ឋមន្ត្រីថ្លែងថា ប៉ុន្តែ ដោយសារ ប្រទេសថៃមានព្រំដែនជាប់ជាមួយកម្ពុជានោះ ឥរិយាបថរបស់យើងគឺខិតខំធ្វើ យ៉ាងណារក្សាទំនាក់ទំនង ធម្មតាជាមួយនឹង ព្រះរាជាណាចក្រថៃ មិនថា រដ្ឋាភិបាលស៊ីវិល ឬ រដ្ឋាភិបាលយោធាទេ ព្រោះវាអត់មានជម្រើសណាផ្សេងឡើយ ។
សម្តេចតេជោបានថ្លែងថា ឥឡូវនេះរដ្ឋាភិបាលយោធាត្រូវបានព្រះមហាក្សត្រថៃឡាយ ព្រះហស្ថលេខាឲ្យដឹកនាំប្រទេស វាចប់ត្រឹម ហ្នឹង វាដូចជានៅកម្ពុជា ដែលបានប្រជុំសភា សភាបោះឆ្នោតហើយ ព្រះមហាក្សត្រចេញព្រះរាជក្រឹត្យមកវាចប់ត្រឹមប៉ុណ្ណឹង វាមិនមាន រឿង អ្វីលើសពីហ្នឹងទៀតទេ ហើយនៅស្រុកថៃក៏អត់មានអ្វីលើសពីហ្នឹងដែរ ព្រោះចេញពីរដ្ឋប្រហារ ក៏គង់ព្រះមហាក្សត្រឡាយ ព្រះ ហស្ថលេខាឲ្យដឹកនាំ ហើយក៏យើងត្រូវតែទាក់ទងជាមួយគេ ដែលជាការចៀសវាមិនរួច ។
សម្តេច ហ៊ុន សែន មានប្រសាសន៍ថា ឥឡូវនេះខុសពីមេដឹកនាំនៅទីក្រុងបាងកករាល់ ថ្ងៃ តើយើងទៅទាក់ទងជាមួយអ្នកណា ? វាអត់មានមនុស្សដឹកនាំជាមួយ ធ្វើការជាមួយ ដូច្នេះ បានជាយើងត្រូវធ្វើទំនាក់ទំនងរឿងនេះ ហើយសង្ឃឹមថា អតីតនាយករដ្ឋមន្ត្រី ថាក់ស៊ីន និង អតីតនាយករដ្ឋមន្ត្រី យីងឡាក់ ក៏ដូចជាគណបក្សភឿថៃនឹងយល់ទៅដល់ជំហរបស់កម្ពុជា ។
ខ្ញុំសូមបញ្ជាក់នូវគោលជំហរបស់កម្ពុជា ទាក់ទងទៅនឹងសភាពការណ៍នៅព្រះរាជាណាចក្រ ថៃ ថា យើងត្រូវខិតខំទំនាក់ ទំនង រវាងកងទ័ព និងកងទ័ពនៅតាមបណ្តាយខ្សែបន្ទាត់ព្រំដែន នគរបាលច្រក អាជ្ញាធរខេត្ត ស្រុកការរកស៊ីរបស់ប្រជាពលរដ្ឋ ប្រជាពល រដ្ឋនៅជាធម្មតា។
នៅក្នុងសង្កថា សម្តេចតេជោនាយករដ្ឋមន្ត្រីបានធ្វើការអំពាវនាវចំពោះប្រជាជនកម្ពុជា ដែលបាន និងកំពុងធ្វើការងារ នៅប្រទេសថៃ ឬក៏ចូលទៅក្នុងប្រទេសថៃ ត្រូវគោរពច្បាប់របស់ ថៃ ដោយមិនត្រូវចូលរួមសកម្មភាពណាគាំទ្រម្ខាង ប្រឆាំងម្ខាងនោះទេ ។
ពាក់ព័ន្ធជាមួយអត្ថាធិប្បាយ ដែលថារដ្ឋាភិបាលថៃត្រូវបានផ្តូលរំលំត្រៀមបង្កើតរដ្ឋាភិ បាលនិរទេស ហើយក្នុងនោះ កម្ពុជាអាច ជាជម្រើសមួយនៃការជ្រើសរើសដាក់ទីតាំងរដ្ឋាភិ បាលនិរទេស សម្តេចតេជោមានប្រសាសន៍ថា បញ្ហានេះខ្ញុំសូមបញ្ជាក់ថា ខ្ញុំមិនបានឃើញ ចេញពីសំដីរបស់ ថាក់ស៊ីន ឬ យីងឡាក់ ទេ ក៏ប៉ុន្តែវាចេញពីសំដីរបស់មេធាវីរបស់គាត់គឺ លោក អាំស្ទែដាំ ទៅវិញ ទេ ។ ខ្ញុំសូមបញ្ជាក់ថា កម្ពុជាមិនមែនជាទីតាំងសម្រាប់ការផ្តល់ឲ្យ ប្រទេសណាមួយ ឬក្រុមអ្នកណាមួយ មិនថាប្រទេសថៃឬប្រទេសណា បង្កើតរដ្ឋាភិបាលនិរ ទេសនៅក្នុងប្រទេសរបស់ខ្លួនទេ ។ រដ្ឋធម្មនុញ្ញរបស់នឹងមិនអនុញ្ញាតឲ្យកម្ពុជាក្លាយទៅជា ទីតាំងប្រឆាំង នៃ ប្រទេសណាមួយទេ គឺកម្ពុជាមិនអនុញ្ញាតឲ្យបរទេសណាមួយយកប្រទេស របស់ខ្លួនដាក់ទីតាំងបង្កើតកម្លាំងប្រឆាំង នឹងរដ្ឋាភិបាល ប្រទេសមួយផ្សេងទេ ។
សម្តេចនាយករដ្ឋមន្ត្រីក៏បានអំពាវនាវផងដែរ ទៅដល់លោកមេធាវី អាំស្ទែដាំ ថា គួរតែ ដកគំនិតនេះចេញទៅ ព្រោះគំនិតនេះនាំ ថាក់ស៊ីន នាំ យីងឡាក់ នាំរដ្ឋាភិបាលភឿថៃទៅរក គ្រោះថ្នាក់ហើយ ។ អ្នកច្បាប់អន្តរជាតិ ហើយធ្វើជាមេធាវីឲ្យ ថាក់ស៊ីន ឲ្យយីងឡាក់ បែរជា ផ្តល់គំនិតឲ្យរដ្ឋាភិបាល ដែលត្រូវរំលំនេះបង្កើតរដ្ឋាភិបាលនិរទេស ។ សម្តេច ហ៊ុន សែន ថ្លែង ថា ក្នុងឋានៈជាអ្នកវិភាគ ហើយមិនមែនក្នុងឋានៈជានាយករដ្ឋមន្ត្រីកម្ពុជាផ្តល់មេរៀននោះ… ជាគំនិតនេះបើខ្ញុំជា ថាក់ ស៊ីន ខ្ញុំបដិសេធចោលភ្លាម បើខ្ញុំជា យីងឡាក់ ខ្ញុំបដិសេធចោលភ្លាម តែម្តង ព្រោះគំនិតនេះគ្រោះថ្នាក់ ។ បង្កើតរដ្ឋាភិបាលនិរទេសតើបង្កើតនៅប្រទេសណា ? កម្ពុជាអត់ហើយ ប្រទេសឡាវ ប្រាប់ថាអត់ ហើយអាស៊ានអត់មានប្រទេសណាទេ ដូច្នេះទៅ បង្កើតនៅឯណា ទៅបង្កើតនៅឋានព្រះច័ន្ទឬអ្វី? ។
សម្តេចតេជោបានពន្យល់ថា តាមធម្មតានៅប្រទេសថៃ ពេលមានរដ្ឋប្រហារគេឃុំមេ ដឹកនាំមួយរយៈ ប៉ុន្តែមិនឲ្យលើសពី ៧ ថ្ងៃទេ បន្ទាប់ពីនោះគេអាចទៅណាក៏បាន ហើយមួយ ឆ្នាំ ពីរឆ្នាំក្រោយមកគេបោះឆ្នោតឡើងវិញ ចុះបើយើបង្កើតរដ្ឋាភិបាលនិរទេស តើអ្នកណា ហ៊ានទទួល បើទីតាំងអគ្គរដ្ឋទូតរបស់ប្រទេសទាំងអស់ទំនាក់ទំនងជាមួយថៃនៅទីក្រុងបាង កក ដូច្នេះរដ្ឋាភិបាលនិ រទេសនៅឯណា ។ អ្នកណាក៏ដោយដែលមានទំនាក់ទំនងជាមួយនឹង រដ្ឋាភិបាលនិរទេស ធ្វើដំណើរទៅប្រទេស ផ្សេងៗ គេអត់ហ៊ាន ទទួលទេ ក្រែងលោរដ្ឋាភិបាល បាងកកខឹង ។ សម្តេចតេជោបានបញ្ជាក់ជាថ្មីថា លោក អាំស្ទែដាំ គួរដកគំនិតរបស់លោក ចេញទៅ ព្រោះផ្តល់គំនិតនេះគឺផ្តល់ឲ្យ ថាក់ស៊ីន និងយីងឡាក់ ស្លាប់តែម្តង៕
ប្រភព៖ AKP
មតិយោបល់