ភ្នំពេញៈ ថ្លែងក្នុងពិធីប្រកាសមុខតំណែង បំពាក់ឋានន្តរសក្តិ ជូនមន្ត្រីនគរបាលជាតិ អង្គភាពអន្តរាគមន៍ ចំនួន១៤០នាក់ នាព្រឹកថ្ងៃទី២ ខែមិថុនា ឆ្នាំ២០១៤នេះ ឯកឧត្ដម ឧត្ដមសេនីយ៍ឯក មួន សារ៉ន ប្រធានអង្គភាពអន្តរាគមន៍ បានមានប្រសាសន៍ថា ដើម្បីបង្កើនសមត្ថភាពបន្ថែម ក៏ដូចជាកាត់បន្ថយភាព ខុសឆ្គងក្នុងការដឹកនាំ និងបង្កើនកិច្ចសហប្រតិបត្តការ មន្ត្រីនគរបាលជាតិ អង្គភាពអន្តរាគមន៍ទាំងអស់ ត្រូវអនុវត្តនូវទិសដៅទាំង ៨ចំណុច ខាងក្រោម៖
១-ទប់ស្កាត់បង្ការបង្ក្រាបបាតុភាព បង្កចលាចល អំពើហិង្សា និងការធ្វើបាតុកម្ម ដោយខុសច្បាប់, ២-ប្រយុទ្ធប្រឆាំងភេរវកម្ម អំពើប្លន់ប្រដាប់អាវុធ ទប់ស្កាត់ និងបង្ក្រាបក្មេងទំនើង, ៣-ពង្រឹងការអនុវត្តន៍ច្បាប់ចរាចរណ៍ផ្លូវគោក និងច្បាប់គ្រប់គ្រងអាវុធ គ្រឿងផ្ទុះ គ្រាប់រំសេវ សំដៅធានាសន្តិសុខ សណ្ដាប់ធ្នាប់ សុវត្ថិភាព អាយុជីវិត សន្តិសុខជាតិ និងប្រជាពលរដ្ឋ, ៤-ចូលរួមសហការ ការពារព្រះរាជពិធី ពិធីបុណ្យជាតិ អន្តរជាតិ និងការយាងអញ្ជើញបំពេញ ទស្សនកិច្ចក្រៅប្រទេស និងក្នុងប្រទេស, ៥-ទំនាក់ទំនងល្អ ដោយសហការជាមួយស្ថាប័ សមត្ថកិច្ចពាក់ព័ន្ធរបស់ជាតិ និងអន្តរជាតិ ដើម្បីការពារសន្តិសុខ និងកិច្ចសហប្រតិបត្តិការ, ៦-ចូលរួមចំណែកជួយឧបត្ថម្ភ ប្រជាពលរដ្ឋ ជនរងគ្រោះ ដែលជួបការលំបាក ឬប្រធានសក្តិ, ៧-ការងារធានាដល់ ការការពារសន្តិសុខ ក្នុងការធ្វើអន្តរាគមន៍ មានកម្លាំងរចនាសម្ព័ន្ធ ដឹកនាំបញ្ជា សម្ភារៈឧបករណ៍ មធ្យោបាយដែលបម្រើឲ្យមុខជំនាញ, ៨-ខិតខំដោះស្រាយជំរក ស្នាក់នៅ កន្លែងធ្វើការប្រចាំថ្ងៃ ផ្គត់ផ្គង់ជីវភាព សំលៀកបំពាក់ ផ្សព្វផ្សាយអប់រំ សុខភាពអនាម័យ បង្ការទប់ស្កាត់ ជំងឺឆ្លងគ្រប់ប្រភេទ និងមានកម្មវិធី កីឡាកាយសម្បទាមាំមួន ។
នាឱកាសនេះ ផងដែរឯកឧត្តម ឧត្ដមសេនីយ៍ឯក មួន សារ៉ន ក៏បានមានប្រសាសន៍កោត សរសើរដល់មន្ត្រីក្រោមឱវាទ ទាំងអស់ដែលបានខិតខំបំពេញភារកិច្ចការ ពារសន្តិសុខ សណ្ដាប់ធ្នាប់សុវត្ថិភាព ជូនថ្នាក់ដឹកនាំជាតិ អន្តរជាតិបានល្អប្រសើរ ដែលធ្វើឲ្យមានទំនុកចិត្ត ពីសំណាក់រាជរដ្ឋាភិបាល ថ្នាក់ដឹកនាំក្រសួងមហាផ្ទៃ អគ្គស្នងការដ្ឋាននគរបាលជាតិ និងសេនាធិការដ្ឋាន។ជាមួយគ្នានោះ ឯកឧត្ដម ក៏បានផ្តាំផ្ញើ ចំពោះនាយនគរបាល នាយនគរបាលរង និងមន្ត្រីនគរបាលជាតិ ដែលទើបទទួលបានភារកិច្ច និងឋានន្តរសក្តិថ្មី ក៏ដូចជាកងកម្លាំង ក្នុងអង្គភាពអន្តរាគមន៍ ទាំងមូលត្រូវបន្ត លើកកម្ពស់ និងពង្រឹងគុណភាព ការគ្រប់គ្រងដឹកនាំ ទទួលអនុវត្ត គោរពបទបញ្ជា ឲ្យបានម៉ឺងមាត់ ត្រឹមត្រូវសមស្របតាម កម្មវិធីនយោបាយរបស់ រាជរដ្ឋាភិបាលកម្ពុជា ក្រសួងមហាផ្ទៃ និងអគ្គស្នងការដ្ឋាននគរបាលជាតិ ។ឯកឧត្ដម ក៏បានសង្កត់ធ្ងន់ផងដែរថា ក្នុងនាមជាកងកម្លាំង នគរបាលជាតិ ត្រូវមានជំហរស្មារតីរឹងមាំ សីលធម៌រស់នៅល្អ ស្មោះត្រង់ចំពោះជាតិ សាសនាព្រះមហាក្សត្រ និងត្រូវប្រកាន់យកនូវវិន័យ សេចក្តីថ្លៃថ្នូរ ឲ្យសមជានគរបាលជាតិ ៕
មតិយោបល់