តារាបាល់ទាត់របស់ក្លិប Atletico Madrid កីឡាករ Diego Costa ត្រូវបានសារព័ត៌មាន BBC ចុះផ្សាយថា កីឡាកររូបនេះ បានឆ្លងកាត់ពិនិត្យសុខភាពរួចរាល់ហើយ ដោយផ្លាស់ទៅកាន់ ក្លិបតោខៀវ ដែលជាក្លិបអ្នកមានលុយ ក្នុងចំណោមក្លិបធំៗ នៅអង់គ្លេស ។ ទន្ទឹមជាមួយនឹងគ្នានេះដែរ កីឡាករដែលកើតនៅ ប្រេស៊ីល រូបនេះនឹងលេង World Cup ឲ្យ អេស្ប៉ាញ បើទោះបីជារបួសកំពុងកំរាមកំហែងក្តី ។
កីឡាករ Diego Costa មានបញ្ហាសរសៃពួរ មុន ការប្រកួត និងក្រោយការប្រកួត ក្នុងក្របខណ្ឌ UEFA Champions League ក្នុងវគ្គផ្តាច់ព្រ័ត្រជាមួយនឹង Real Madrid ដែលធ្វើឲ្យក្លិបមួយនេះ មិនអាចលើកពាន នេះបាន។
ជាមួយនឹងព័ត៌មានឆ្លងកាត់ការពិនិត្យសុខភាពនេះដែរ កីឡាករវ័យ ២៥ ឆ្នាំ ត្រូវបានគេជឿជាក់ថា ការចរចារ បានដំណើរការជោគជ័យ ជាមួយនឹងក្លិបតោខៀវ ក្នុងតម្លៃខ្លួន ប្រហែល ៣២ លានផោន។
សម្រាប់នៅក្លិប Atletico Madrid កីឡាករ Diego Costa រកគ្រាប់បាល់ជូនក្លិបបាន ២៧ គ្រាប់ ក្នុងចំណោម ៣៥ ប្រកួតដែលបង្ហាញខ្លួន ដោយស្ថិតនៅលេខរៀងទី ៣ ក្នុងចំណោមកីឡាករ Ronaldo រកបាន ៣១ គ្រាប់ និង Messi ២៨ ដែលរកគ្រាប់បាល់ច្រើនជាងគេ នៅ La Liga ៕
មតិយោបល់