គណៈកម្មការបោះឆ្នោត (EC) របស់ប្រទេសថៃ កំពុងចោទប្រកាន់អតីតនាយករដ្ឋមន្ត្រី លោក ស្រី យីងឡាក់ ស៊ីណាវ៉ាត្រា ពីបទរំលោភអំណាចតាមរយៈការប្រើប្រាស់មូលនិធិសាធារណៈដើម្បីធ្វើយុទ្ធនាការសម្រាប់ការបោះឆ្នោត។
កាសែតបាងកកប៉ុស្តិ៍ បានដកស្រង់សម្តីប្រភពថ្នាក់ខ្ពស់មួយនៅ EC ដែលនិយាយថា ពួកអ្នកស៊ើបអង្កេត EC បានចោទប្រកាន់ថា លោកស្រី យីងឡាក់ ព្រមជាមួយអតីតរដ្ឋមន្ត្រីគណៈរដ្ឋ មន្ត្រី៨រូបទៀត ព្រមទាំងមេប៉ូលិសថ្នាក់ជាតិ បានរំលោភលើច្បាប់រដ្ឋធម្មនុញ្ញ ឆ្នាំ ២០០៧ ដែលបាន ទុកជាមោឃៈរួចស្រេចទៅហើយនោះ តាមរយៈការធ្វើដំណើរនៅទូទាំងប្រទេសនៅមុនការបោះឆ្នោតទូទៅថ្ងៃទី២ ខែកុម្ភៈ ដែលក្រោយមកត្រូវបាន ទុកជាមោឃៈនោះ ។
នេះគឺជាការចោទប្រកាន់ថ្មីមួយប្រឆាំងនឹងលោកស្រី យីងឡាក់ បន្ទាប់ពីករណី ដែលមានទ្រង់ទ្រាយខ្ពស់ ដែលក្នុងនោះគណៈកម្មការប្រឆាំងអំពើ ពុករលួយថ្នាក់ជាតិ (NACC) បានចោទប្រកាន់អតីតនាយករដ្ឋមន្ត្រីពីបទធ្វេសប្រហែសភារកិច្ច ក្នុងការត្រួតពិនិត្យមើលគម្រោងសន្យាស្រូវ ដែល មានរឿងចម្រូងចម្រាសមួយ ។
NACCបានបញ្ជូនករណីនេះទៅឱ្យការិយាល័យអគ្គមេធាវី សម្រាប់ធ្វើការចោទប្រកាន់ ។ ប្រសិនបើរកឃើញកំហុស លោកស្រីអាចប្រឈមមុខ នឹង ការជាប់ពន្ធនាគារ ក៏ដូចជាហាមប្រាមមិនឱ្យធ្វើនយោបាយមួយរយៈពេល៥ឆ្នាំ ។
តាមប្រភពនោះបានឱ្យដឹងថា ការធ្វើដំណើរដែល EC បាននឹងកំពុងធ្វើការស៊ើបអង្កេតត្រូវបានធ្វើឡើងនៅពេលដែលលោកស្រី យីងឡាក់ និង គណៈរដ្ឋមន្ត្រីលោកស្រីស្ថិតនៅក្នុងឋានៈជា អ្នកចាំផ្ទះ បន្ទាប់ពីការរំលាយសភាតំណាងកាលពីថ្ងៃទី៩ ខែធ្នូឆ្នាំ ២០១៣ ។
ប្រភពបាននិយាយថា ការធ្វើដំណើរនោះបានរំលោភលើផ្នែក ១៨១ នៃច្បាប់រដ្ឋធម្មនុញ្ញ ដែលចែងថា គណៈរដ្ឋមន្ត្រីដែលចេញពីតំណែងត្រូវឈប់ លែងប្រើប្រាស់ធនធានឬបុគ្គលិករបស់រដ្ឋ ដើម្បីធ្វើសកម្មភាពមួយ ដែលអាចធ្វើឱ្យប៉ះពាល់ដល់លទ្ធផលនៃការបោះឆ្នោតទូទៅមួយ។
ប្រភពនោះបាននិយាយបន្ថែមថា អ្នកដែលមានជាប់ពាក់ព័ន្ធទាំងអស់ នឹងត្រូវគេហៅឱ្យ ទៅការពារខ្លួនពួកគេនៅចំពោះមុខគណៈកម្មការស៊ើប អង្កេតរបស់ EC ដែលត្រូវរង់ចាំសកម្មភាព ថែមទៀតនោះ ៕
មតិយោបល់