ភ្នំពេញ៖ ចាប់តាំងពីខែមករា ដល់ខែមិថុនា ការនាំចេញជ័រកៅស៊ូស្ងួតមានចំនួន៤២.១៨៩តោន គឺកើនឡើង៤២ភាគរយបើធៀបទៅនឹងការនាំចេញជ័រកៅស៊ូអំឡុងឆមាសទី១ដើមឆ្នាំ២០១៣។ នេះយោងតាមតួលេខថ្មីបំផុតរបស់ក្រសួងពាណិជ្ជកម្ម។
បើទោះបីជាការនាំចេញកើនឡើងក្តី ក៏ប្រាក់ចំណូលបានពីការនាំចេញជ័រកៅស៊ូរយៈពេលកន្លះឆ្នាំនេះ បានធ្លាក់ចុះជិត២ភាគរយ ពី៧៦,៥លានដុល្លារអាមេរិកមកនៅត្រឹម៧៥លានដុល្លារអាមេរិក ដោយសារតែតម្លៃជ័រកៅស៊ូធ្លាក់ចុះ។
តម្លៃជ័រកៅស៊ូក្នុងស្រុក និងក្នុងពិភពលោក បានធ្លាក់ចុះក្នុងរយៈពេលពីរ-បីឆ្នាំចុងក្រោយនេះដោយសារតែទីផ្សារមានការផ្គត់ផ្គង់ច្រើនហួស និងតម្រូវការទាបពីប្រទេសចិន ដែលជាប្រទេសនាំចូលជ័រកៅស៊ូឆៅដ៏ធំ។
គួរបញ្ជាក់ផងដែរថា កៅស៊ូ ធ្លាប់ត្រូវបានលោកនាយករដ្ឋមន្ត្រី ហ៊ុន សែន កោតសរសើរ និងចាត់ទុកជាទំនិញកសិកម្មនាំចេញដ៏សំខាន់ទី២របស់កម្ពុជា ដែលរកចំណូលបានច្រើន ហើយកំណត់គោលដៅបង្កើនផ្ទៃដីកសិកម្មជិតបីដងសម្រាប់ដាំកៅស៊ូ ពី៣០០.០០០ហិកតាដល់៨៤០.០០០ហិកតាក្នុងរយៈពេល៥ឆ្នាំ៕
មតិយោបល់